اسلام آ باد(پی پی آ ئی) پاکستانی مصنوعات کی اسرائیلی مارکیٹس میں فروخت کی خبروں پر دفتر خارجہ نے اپنا ردعمل دےتے ہو ئے کہا کہ پاکستان کے اسرائیل کے ساتھ کوئی سفارتی یا تجارتی تعلقات نہیں ہیں۔ترجمان دفتر خارجہ کے مطابق پاکستان کے اسرائیل کے ساتھ کوئی سفارتی یا تجارتی تعلقات نہیں ہیں، پاکستان کی اسرائیل سے متعلق پالیسی میں کوئی تبدیلی نہیں ہے۔دفتر خارجہ کے ترجمان کا مزید کہنا تھا کہ اسرائیلی مارکیٹس میں پاکستانی مصنوعات کی فروخت سے متعلق خبروں پر مزید تبصرے کیلئے وزارت تجارت سے رابطہ کیا جائے۔واضح رہے کہ ترجمان دفتر خارجہ نے یہ وضاحت سوشل میڈیا پر گردش کرتی پاکستان کی اسرائیل کے ساتھ تجارت کی خبروں کے بعد کی۔ سوشل میڈیا پر اس حوالے سے موجودہ حکومت کو شدید تنقید کا نشانہ بھی بنایا جا رہا ہے۔