ممبئی(این این آئی) مشہور و معروف بھارتی آل راؤنڈر یوراج سنگھ نے بھارتی سلیکٹرز کی جانب سے مستقل نظر انداز کیے جانے کے باوجود کہا ہے کہ فی الحال ان کا ریٹائرمنٹ کا کوئی ارادہ نہیں اور ابھی میں مزید دو سے تین آئی پی ایل ایڈیشن کھیل سکتا ہوں۔یوراج سنگھ کو 40 ٹیسٹ 304 ون ڈے اور 58 ٹی ٹونٹی بین الاقوامی میچز میں بھارت کی نمائندگی کا اعزاز حاصل ہے تاہم گزشتہ دو سے تین سالوں کے دوران وہ اپنے کیریئر کے بدترین دور سے گزر رہے ہیں جہاں ان پر اس دورانیے کے اکثر حصے میں ٹیم کے دروازے بند رہے۔

ان کی ایک طویل عرصے کے بعد گزشتہ سال جنوری میں بھارتی ٹیم میں واپسی ہوئی لیکن چیمپیئنز ٹرافی میں ناقص کارکردگی سمیت 11 میچوں میں واجبی کھیل پر انہیں ہر طرح کے فارمیٹ کیلئے ٹیم سے ڈراپ کردیا گیا، انہوں نے آخری بار گزشتہ سال جون میں بھارت کی نمائندگی کی تھی۔گزشتہ سال انگلینڈ میں منعقدہ چیمپیئنز ٹرافی کے بعد بھارتی سلیکٹرز انہیں مسلسل نظر انداز کر رہے ہیں اور دلیپ ٹرافی کے سکواڈز میں بھی وہ جگہ نہیں بنا سکے تھے جس سے لگتا ہے کہ ان کا انٹرنیشنل کیریئر ختم ہو چکا ہے۔

تاہم مستقل نظر انداز کیے جانے کے باوجود وہ دوبارہ بھارتی ٹیم کی نمائندگی کیلئے پرعزم ہیں۔اپنے ایک بیان میں بھارتی آل راؤنڈر نے کہا کہ میں مکمل طور پر فٹ ہوں اور آئی پی ایل میں عمدہ پرفارم کر کے ٹیم میں دوبارہ واپسی کروں گا۔یاد رہے کہ 2011 ورلڈ کپ کے کے بہترین کھلاڑی کا اعزاز حاصل کرنے والے مایہ ناز آل راؤنڈر آئی پی ایل 2018 میں کنگز الیون پنجاب کی نمائندگی کریں گے۔یوراج نے کہا کہ ابھی میری کرکٹ باقی ہے اس لیے انٹرنیشنل سطح پر دوبارہ ملک کی نمائندگی کیلئے بے چین ہوں، کرکٹ سے لطف اندوز ہو رہا ہوں اور جب سمجھا کہ میں مزید کھیلنے کے قابل نہیں تو کھیل سے کنارہ کشی اختیار کر لوں گا۔