لاہور(مانیٹرنگ ڈیسک)نیوزی لینڈ کرکٹ ٹیم کے سابق کپتان برینڈن مک کولم اور انگلینڈ کی ون ڈے اور ٹی ٹوئنٹی کے کپتان آئن مورگن پاکستان سپر لیگ (پی ایس ایل) کے ڈرافٹ میں شمولیت پر رضامند ہوگئے ہیں۔پی ایس ایل کے چیئرمین نجم سیٹھی کے مطابق برینڈن مک کولم اور آئن مورگن بین الاقوامی اسٹارز ہیں جو نہ صرف بین الاقوامی کرکٹ کا وسیع تجربہ لائیں گے بلکہ پی ایس ایل کے کھلاڑیوں کے لیے اپنے قیمتی قائدانہ تجربے سے فائدہ پہنچائیں گے۔ذرائع کے مطابق ٹیموں کو 14 ستمبر 2016 تک موجودہ کھلاڑیوں سے دوبارہ مذاکرات کیلئے ذریعے برقرار رکھنے کا موقع دیا گیا ہے،
ٹیموں کو طے شدہ اپنے ڈرافٹ کے مطابق کھلاڑیوں کے ٹرانسفر کا برابرموقع حاصل ہے یا پھرموجودہ اسکواڈ کو بہترین ٹیم کے طور پر برقرار رکھ سکتے ہیں۔کھلاڑیوں کی ڈرافٹنگ اکتوبر میں متحدہ عرب امارات میں اس وقت ہوگی جب پاکستانی کھلاڑی ہوم سیریز میں مصروف ہوں گے۔ڈرافٹنگ کا طریقہ کار گزشتہ سال کی طرح ہوگا جہاں لاہور قلندرز ہر مرحلے میں پہلے کھلاڑیوں کا انتخاب کرے گی جس کے بعد کراچی کنگز اور تیسرے نمبر پر پشاور زلمی اپنے کھلاڑیوں کا چناؤ کرے گی جبکہ کوئٹہ گلیڈی ایٹرز چوتھے اور اسلام آباد یونائیٹڈ کی ٹیم آخر میں کھلاڑی حاصل کرے گی۔پی ایس ایل کے نئے سیزن میں کھلاڑیوں کے معاوضے کو 1.2 ملین ڈالر تک بڑھانے کیلئے پانچوں فرنچائزوں نے رضامندی کا اظہار کیا ۔سیٹھی کے مطابق ہم پی ایس ایل کے پہلے سیزن کی کامیابی پر خوش ہیں اور دوسرے سیزن کیلئے تیاریاں پرجوش مرحلے میں داخل ہورہی ہیں۔