لاہور( این این آئی) پاکستان پیپلز پارٹی پارلیمنٹرینز کے سربراہ و سابق صدر مملکت آصف علی زرداری نے کہا ہے کہ صبر کا وہ پھل ملے گا جس کا آپ کو اندازہ ہی نہیں،سارے دکھ درد دور ہو جائیں گے ،میں نے 14برس جیل میں معیشت پر بہت ساری کتب کا مطالعہ کیا ہے،

ایسے حل دئیے جس کی وجہ سے ہمارے دور میں زر مبادلہ کے ذخائر 24ارب ڈالر ہو گئے تھے،ان شاللہ ملکی معیشت کو سنبھالوں اور زر مبادلہ ذخائر 100ارب ڈالر تک پہنچائوں گا ۔ ان خیالات کا اظہار انہوں نے وسطی پنجاب کے ٹکٹ ہولڈرز سے خطاب کرتے ہوئے کیا ۔ اس موقع پر پیپلز پارٹی کے سیکرٹری جنرل سید نیئر حسین بخاری،قائمقام صدر وسطی پنجاب رانا فاروق سعید،جنرل سیکرٹری سید حسن مرتضی،شہزاد سعید چیمہ ،احمد جواد فاروق رانا،فیصل میر،تسنیم قریشی،اسلم گل،جمیل منج،آصف بشیر بھاگٹ،مہر غلام فرید کاٹھیا،عمران نول اور دیگر ڈویژنل صدور و ٹکٹ ہولڈرز بھی موجود تھے۔ آصف زرداری نے کہا کہ پیپلز پارٹی اور میں نے ہمیشہ جدوجہد کی ہے،کارکن صبر کریں، صبر کا وہ پھل ملے گا جس کا آپ کو اندازہ ہی نہیں،سارے دکھ درد دور ہو جائیں گے ۔آصف زرداری نے کہا کہ میں نے 14برس جیل میں معیشت پر بہت ساری کتب کا مطالعہ کیا ہے،ایسے حل دئیے جس کی وجہ سے ہمارے دور میں زر مبادلہ کے ذخائر 24ارب ڈالر ہو گئے تھے،ان شا اللہ ملکی معیشت کو سنبھالوں اور زر مبادلہ ذخائر 100ارب ڈالر تک پہنچائوں گا۔آصف زرداری نے کہا کہ فوج کا بڑا خرچ نہیں خوامخواہ اس پر پراپیگنڈہ کیا جاتا ہے،سیاست میں ہر چیز کو کرنے کا حل موجود ہے۔

آصف زرداری نے عمران خان کا نام لیے بغیر کہا کہ جن کو سیاست نہیں آتی ،ان کے پاس حل بھی نہیں ہوتا،اسی لیے وہ ہونے والی چیز کو بھی نہیں ہونے دیتے۔ایک اور موقع پر آصف زرداری نے کسی کا نام لئے بغیر کہاکہ یہ دو ماہ میں الیکشن نہیں کرا سکتے،یہ تبھی ہوں گے جب میں کرائوں گا ۔