اسلام آباد (این این آئی)سابق وزیر اعظم عمران خان کی گرفتاری کے بعد 9 مئی کو جلاؤ گھیراؤ اور توڑ پھوڑ کرنے والے شرپسندوں نے کروڑوں روپے مالیت کے سیف سٹی کیمروں کوبھی نقصان پہنچایا جس کی رپورٹ سیف سٹی اتھارٹی نے حکومت کو بھجوا دی۔

سیف سٹی اتھارٹی کی رپورٹ کے مطابق 9 مئی حملوں کے دوران ایک کروڑ 51 لاکھ 55 ہزار روپے مالیت کے کیمرے توڑے گئے جن میں 55 لاکھ روپے مالیت کے کیمرے گرجا چوک کے قریب توڑے گئے۔رپورٹ میں بتایا گیا کہ 24 لاکھ روپے مالیت کانقصان کینال روڈ اور زمان پارک کے قریب کیا گیا جبکہ اسٹیٹ گیسٹ ہاؤس، ماڈل ٹاؤن اور جیل روڈ پر ڈیجیٹل سرویلنس تنصیبات کو بھی تباہ کیا گیا۔رپورٹ کے مطابق احتجاج میں 53 لاکھ روپے مالیت کی ٹریفک کنٹرول سائٹس کو تباہ کیا گیا جبکہ کلب چوک اور ڈیوس روڈ سمیت اہم شاہراہوں پر ٹریفک سائٹس کو بھی نقصان پہنچایا گیا۔رپورٹ کے مطابق سیف سٹی تنصیبات کے مجموعی نقصان کا تخمینہ 2 کروڑ 4 لاکھ 60 ہزار لگایا گیا ہے۔