اسلام آباد (این این آئی)وفاقی حکومت نے منی بجٹ کے ٹیکسز آئندہ بجٹ میں برقرار رکھنے کا فیصلہ کیا ہے۔تفصیلات کے مطابق وفاقی حکومت نے آئی ایم ایف کے مطالبے پر منی بجٹ کے ٹیکسز آئندہ بجٹ میں برقرار رکھنے کا فیصلہ کیا ہے ۔
ذرائع کے مطابق فروری میں عائد کئے گئے 177ارب روپے کے ٹیکسز آئندہ وفاقی بجٹ 2023-24 میں برقرار رہیں گے،منی بجٹ ٹیکسز برقرار رہنے سے حکومت کو 500ارب روپے کی اضافی آمدنی ہوگی۔ذرائع کے مطابق آئندہ بجٹ میں سیلز ٹیکس کی شرح کو 18فیصد پر برقرار رکھا جائے گا اور لگژری اشیاء پر 25فیصد سیلز ٹیکس بھی برقرار رہے گا۔
ذرائع کے مطابق بجٹ میں نان فائلرز کی کڑی نگرانی کا فیصلہ کیا گیاہے، نان فائلرز سے لین دین کرنے والوں کی بھی مانیٹرنگ ہوگی جبکہ ٹیکس چوروں کیخلاف آرٹیفیشل انٹیلی جنس استعمال کرنے کا فیصلہ کیا گیا ہے۔ ذرائع کے مطابق ٹیکس نظام کو ڈیجیٹلائز کر کے ٹیکس آمدن بڑھائی جائیگی، ایف بی آر کو ٹیکس فائلرز کی تعداد بڑھانے کا بھی ہدف دیا گیا ہے۔
