نئی دہلی(این این آئی)ایئر انڈیا کی پرواز لندن کیلئے روانگی کے بعد ایک مسافر کے انتہائی غیر اخلاقی اور بے ہنگم رویے کی وجہ سے بیچ راستے سے ہی واپس آگئی۔بین الاقوامی میڈیا کے مطابق ایئر انڈیا کے ترجمان نے بتایا کہ ایئر انڈیا کی پرواز AI 111 دس اپریل 2023 کو دہلی سے لندن کیلئے روانہ ہوئی تھی

جسکے کچھ ہی دیر بعد فلائٹ واپس نئی دہلی کے ایئرپورٹ پر اتر گئی۔طیارے میں موجود ایک مسافر جس نے زبانی اور تحریری انتباہات کو بھی نظرانداز کیا، کے انتہائی بدتمیز اور بے ہنگم رویے کی وجہ عملے کے دو افراد کو جسمانی نقصان پہنچا جس کے بعد فلائٹ کو واپس نئی دہلی کے ایئرپورٹ اتار دیا گیا۔ایئر انڈیا کے ترجمان نے کہاکہ پائلٹ ان کمانڈ نے دہلی واپس آنے کا فیصلہ کیا اور مسافر کو لینڈنگ کے بعد سیکورٹی اہلکاروں کے حوالے کر دیا گیا۔ پولیس میں مسافر کیخلاف مقدمہ بھی درج کردیا گیا ہے۔ایئرانڈیا نے کہا کہ ہمارے لیے جہاز میں موجود تمام افراد کی حفاظت، سلامتی اور وقار اہم ہے۔ ہم متاثرہ عملے کے ارکان کی ہر ممکن دلجوئی کر رہے ہیں اور مسافروں کو پریشانی کا سامنا کرنے پر افسوس کرتے ہیں۔