لاہور ( این این آئی) قومی احتساب بیورو (نیب ) نے سابق وزیر اعلیٰ پنجاب و مرکزی صدر پاکستان تحریک انصاف چودھری پرویز الٰہی کے گرد گھیرا تنگ کر دیا ،ماسٹرپلان 2050ء کی تحقیقات میں معاونت کے لئے ڈائریکٹر جنرل لاہور ڈویلپمنٹ اتھارتی کو مراسلہ بھجوا دیا ۔

ذرائع کے مطابق لاہور کے ماسٹرپلان کی غیرقانونی منظوری میں سرکاری خزانے کو 300ارب کا نقصان پہنچانے کے الزام میں سابق وزیراعلی پنجاب پرویز الٰہی کے خلاف تحقیقات کی جا رہی ہے ۔نیب کی جانب سے ماسٹر پلان 2050ء کی تحقیقات میں معاونت کے لئے ڈی جی ایل ڈی اے کو مراسلہ ارسال کردیا گیا ہے، جس میں گریڈ 18کے افسر کو فوکل پرسن مقرر کرنے کی ہدایت کی گئی ہے۔مراسلے میں ڈی جی ایل ڈی اے کو کہا گیا ہے کہ ان کا فوکل پرسن نیب کے ڈپٹی ڈائریکٹر انویسٹی گیشن سے رابطہ کرے، ڈی جی ایل ڈی اے بے ضابطگیوں کی تحقیقات میں معاونت کریں۔واضح رہے کہ ماسٹر پلان 2050ء لاہور، قصور، شیخوپورہ اور ننکانہ صاحب کے لئے بنایا گیا تھا اور اس پر 2020ء میں کام کا آغاز کیا گیا تھا۔