لاہور( این این آئی)پاکستان کے ساتھ کھیلی جانے والی سیریز کے لیے سابق پاکستانی ہیڈ کوچ ثقلین مشتاق نے نیوزی لینڈ کے کنسلٹنٹ بننے کی پیشکش قبول کر لی۔نیوزی لینڈ نے سابق پاکستانی ہیڈ کوچ ثقلین مشتاق سے رابطہ کیا اور اس دوران کنسلٹنٹ بننے کی پیشکش کی،

اسی دوران ثقلین مشتاق نے قریبی دوستوں کے ساتھ مشاورت کے بعد نیوزی لینڈ ٹیم کے کنسلٹنٹ بننے کی پیشکش قبول کرلی۔ثقلین مشتاق کیویز کے ساتھ بطور کنسلٹنٹ پاکستان کے خلاف سیریز میں کام کریں گے ۔بتایا گیا ہے کہ ثقلین مشتاق پاکستانی کمیونٹی کی دعوت پر امریکہ روانہ ہوئے، امریکہ جانے سے قبل ثقلین مشتاق نے نیوزی لینڈ کرکٹ بورڈ کو پیشکش قبول کرنے سے متعلق بتا دیا۔کیویز بورڈ نے ثقلین مشتاق سے گفتگو کرتے ہوئے کہا کہ چاہتے ہیں نیوزی لینڈ کرکٹ ٹیم پاکستان کے خلاف اچھا کھیلے اس لئے آپ کی خدمات چاہئیں،آپ کی کوچنگ میں پاکستان نے اچھے نتائج دئیے پاکستان ٹیم کو آپ سے بہتر کوئی نہیں جانتا آپ کی مدد درکار ہے ۔ذرائع کے مطابق ثقلین مشتاق نیوزی لینڈ کرکٹ ٹیم کو بطور کنسلٹنٹ 12 اپریل کو جوائن کریں گے۔پاکستان اور نیوزی لینڈ کے درمیان 5 ون ڈے اور 5 ٹی 20 میچز کی سیریز شیڈول ہے۔