ویلنگٹن ( این این آئی)نیوزی لینڈ کرکٹ ٹیم نے دوسرے ٹیسٹ میچ میں سنسنی خیز مقابلے کے بعد انگلینڈ کو ایک رن سے تاریخی شکست دے دی۔میزبان نیوزی لینڈ نے فالو آن ہونے کے بعد ٹیسٹ میچ جیت لیا، دو ٹیسٹ میچز کی سیریز ایک ایک سے برابر ہو گئی۔
نیوزی لینڈ کے کین ولیمسن پلیئر آف دی میچ اور انگلینڈ کے ہیری بروک پلیئر آف دی سیریز قرار پائے۔نیوزی لینڈ نے انگلینڈ کو دوسرا ٹیسٹ جیتنے کے لیے 258 رنز کا ہدف دیا تھا، مہمان ٹیم دوسری اننگز میں 256رنز بنا کر آئوٹ ہو گئی۔انگلینڈ کی جانب سے جو روٹ نے 95رنز بنائے، بین فوکس 35اور بین اسٹوکس 33رنز کے ساتھ نمایاں رہے۔نیوزی لینڈ کی طرف سے نیل ویگنر نے 4اور ٹم ساوتھی نے 3 وکٹیں حاصل کیں۔انگلینڈ نے پہلی اننگز 435 رنز 8 کھلاڑی آئوٹ پر ڈکلیئر کی تھی۔نیوزی لینڈ نے پہلی اننگز میں 209 اور فالو آن کے بعد دوسری اننگز میں 483 رنز بنائے۔ٹیسٹ کرکٹ کی تاریخ میں 1 رن سے میچ جیتنے کا دوسرا واقعہ ہے۔اس سے قبل جنوری 1993ء میں ویسٹ انڈیز نے آسٹریلیا کو ایک رن سے ہرایا تھا۔نیوزی لینڈ فالو آن کے بعد ٹیسٹ جیتنے والی تیسری ٹیم ہے۔اس سے قبل انگلینڈ نے دو مرتبہ، بھارت نے ایک مرتبہ فالو آن کے بعد کامیابی حاصل کی۔آخری مرتبہ بھارت نے مارچ 2001 میں فالو آن کے بعد فتح حاصل کی تھی۔
