اسلا م آباد(این این آئی)پاکستان کرکٹ بورڈ کے سابق چیئرمین رمیز راجا نے انکشاف کیا ہے کہ انہیں آسٹریلوی ٹیم کے دورے کے دوران جان سے مارنے کی دھمکیاں ملیں۔نجی میڈیا کو دئیے گئے انٹرویو کے دوران رمیز راجا نے پی سی بی کے خرچ پر ایک کروڑ 35 لاکھ کی
بلٹ پروف گاڑی رکھنے کے سوال پر انکشاف کیا کہ وہ گاڑی اس لیے دی گئی تھی کہ مجھے جان سے مارنے کی دھمکیاں ملی تھیں،آسٹریلوی ٹیم کے دورے کے دوران مجھے جان سے مارنے کی دھمکیاں ملیں، اس کے بعد ڈی آئی جی اور پولیس میرے گھر آئی رپورٹ ہوا اور مجھے گاڑی دی گئی جو کہ اب پی سی بی کے پاس ہے، اب وہ گاڑی نئے چیئرمین کمیٹی استعمال کریں گے۔بلٹ پروف گاڑی رکھنے کی وضاحت پر رمیز راجا نے کہاکہ کسی بھی شخص کو بلٹ پروف گاڑی تب تک نہیں مل سکتی جب تک اسے جان سے مارنے کی دھمکیاں نہ ملی ہوں، یہی وجہ تھی کہ مجھے بلٹ پروف گاڑی دی گئی۔دوسری جانب سے میچ فکسنگ کے حوالے سے جسٹس قیوم کی رپورٹ آنے کے بعد وقار یونس کے کوچ بننے اور وسیم اکرم کے کمنٹری کرنے پر رمیز راجا نے کہاکہ میرے حساب سے اس رپورٹ کے بعد وسیم اکرم سمیت کسی کی ٹیم میں کوئی گنجائش نہیں ہونی چاہیے تھی۔رپورٹ آنے کے باوجود دونوں شخصیات کے ساتھ کھیلنے اور کمنٹری کرنے پر سابق چیئرمین پی سی بی نے کہاکہ جب مجھ سے لوگ اس حوالے سے پوچھتے ہیں تو میں یہی کہتا ہوں اگر اس وقت میرے پاس فیصلہ کرنے کا اختیار ہوتا تو میں کبھی نہ آنے دیتا، کیوں کہ اس وقت فیصلے کا اختیار میرے پاس نہیں تھا تو ہم سے یہی کہا گیا تھا کہ ان کے ساتھ آپ نے کھیلنا بھی ہے اورکام بھی کرنا ہے ۔
