ریوڈی جنیرو(این این آئی )ٹیلی ویژن کے ایک پروگرام میں حاضرین کی تالیوں کے درمیان دو لیجنڈ آنجہانی فٹ بالر پیلے اور میراڈونا نے سر سے فٹ بال کھیلا تھا۔ دونوں پیلے کی وفات کے بعد یہ ویڈیو کلپ ایک یادگار کے طور پر سامنے آگیا ہے۔

ماضی کا یہ ویڈیو کلپ فٹ بال کے مداحوں میں پھر گردش کر رہا ہے۔برازیل کے بادشاہ پیلے کے انتقال کے بعد سوشل میڈیا پر ارجنٹائن کے آنجہانی لیجنڈ ڈیاگو آرمانڈو میراڈونا کے ساتھ ان کی ایک نایاب ویڈیو گردش کر رہی ہے۔ ٹی وی شو کے دوران میرا ڈونا نے کہا کہ میرا خواب آپ کے ساتھ سر سے گیند کھیلنا ہے۔ اس کے بعد حاضرین کی تالیوں کے درمیان دونوں آنجہانی ستارے اٹھے اور زبردست مہارت سے کئی مرتبہ گیند کو اپنے سروں سے اچھالتے رہے۔ کلپ کا اختتام دونوں ستاروں کے درمیان گرمجوشی سے گلے ملنے کے ساتھ ہوا۔ یاد رہے میراڈونا 25 نومبر 2020 کو 60 سال کی عمر میں دل کا دورہ پڑنے سے انتقال کر گئے۔