برازیلیا( این این آئی) دنیا بھر میں پیلے کے نام سے شہرت یافتہ آنجہانی برازیلین فٹ بالر پیلے نے 9برس کی عمر میں اپنے والد سے کیا گیا وعدہ 17برس کی عمر میں پورا کیا۔تفصیلات کے مطابق آپ مت روئیں، اگلی مرتبہ میں برازیل کو ورلڈ کپ جتوائوں گا، کم سنی کے عالم میں چھوٹے پیلے کے

منہ سے نکلے الفاظ جوانی کی دہلیز پر قدم رکھتے ہی پورے ہوگئے تھے۔ تین لگاتار ورلڈ کپ جیتنے والی فاتح ٹیموں میں شامل شہنشاہِ فٹبال پیلے اپنے مداحوں سے ہمیشہ کیلئے بچھڑ گئے۔انہوں نے ایک بار اپنے انٹرویو میں بتایا کہ کس طرح انہوں نے صرف 9 برس کی عمر میں اپنے والد سے کیا گیا وعدہ 17 برس کی عمر میں پورا کیا۔انہوں نے بتایا کہ 1950 کے ورلڈ کپ میں برازیل کی ٹیم کو متوقع فاتح سمجھا جا رہا تھا لیکن فائنل میں اسے یوراگوئے کے ہاتھوں شکست کا سامنا کرنا پڑا۔جس پر ایک جانب پورے ملک میں سوگ کا سماں تھا اور ہم اپنے گھر میں میچ کی کمنٹری سن رہے تھے کہ برازیل کی ٹیم کے ہارنے کی خبر پروالد زاروقطار رونے لگے۔اس موقع پر میں کوئی 9 یا 10 برس کا تھا والد کو دیکھ کر انہیں د لاسہ دینے لگا کہ آپ مت روئیں، اگلی مرتبہ میں برازیل کو ورلڈ کپ جتوائوں گا۔ان کے مطابق پھر 8 برس بعد 17 برس کی عمر میں خدا نے انہیں وہ تحفہ دیا اور وہ برازیل کی اس ٹیم کا حصہ تھے جو ورلڈ کپ کی فاتح بنی۔تاہم وہ یہ بھی کہتے ہیں کہ انہیں نہیں معلوم کے انہوں نے اپنے والد سے یہ وعدہ کس اعتماد کی بنیاد پر کیا تھا مگر وہ اپنا وعدہ پورا کرنے میں کامیاب رہے۔