لاہور ( این این آئی) لاہور میں نیو ایئر نائٹ پر ون ویلنگ، تیز رفتاری اور ہلڑبازی روکنے کیلئے 90 مقامات پر خصوصی ناکہ جات لگائے جائیں گے۔اس حوالے سے چیف ٹریفک آفیسر لاہور ڈاکٹر اسد ملہی نے بتایا کہ 11ڈی ایس پیز، 72انسپکٹر، 13سو سے زائد وارڈنز تعینات ہونگے،

ایس پی سہیل فاضل، ایس پی شہزاد خان مکمل سپرویژن کریں گے ۔ انہوں نے کہا کہ مال روڈ، جیل روڈ، فیروز پور روڈ، کینال روڈ، جی ٹی روڈ پر موٹر سائیکلسٹ دستے تعینات ہونگے، مین بلیوارڈ گلبرگ اور علامہ اقبال روڈ، مین بلیوارڈ ڈیگنس پر بھی اضافی نفری تعینات ہوگی، بغیر سائیلنسر موٹرسائیکلوں، رکشوں کو بند کردیا جائے گا۔انہوں نے کہا کہ ون ویلنگ، تیز رفتاری اور موٹرسائیکل پر کرتب دیکھانے پر حوالات میں بند کیا جائے گا اور کم عمر ڈرائیورز کی موٹرسائیکل بند کر دی جائے گی۔والدین کی طرف سے ضمانتی مچلکے وصول کرنے کے بعد موٹر سائیکل، رکشہ، گاڑی کو چھوڑا جائے گا۔ڈاکٹر اسد ملہی نے کہا کہ بغیر نمبر پلیٹ، اپلائیڈ فار وہیکلز کو بھی بند کر دیا جائیگا، کم عمر ڈرائیورز اور ون ویلرز کے حادثات کی وجہ والدین خود ہونگے، ون ویلرز کی نشاندہی پر موٹرمکینک کیخلاف بھی سخت کارروائی کی جائے، ون ویلرز اور کرتب دکھانے والے کسی رعائت کے مستحق نہیں ہونگے۔انہوں نے کہا کہ شہری ہیلپ لائن 15 پر ون ویلنگ کی فوری اطلاع دیں، سٹی ٹریفک پولیس الیکٹرانک و سوشل میڈیا پر بھی بھرپور آگاہی مہم چلا رہی ہے، محفوظ سفر کیلئے تمام شہریوں کو مثبت کردار ادا کرنا ہوگا۔