لاہور( این این آئی) مسلم لیگ (ن) ،پیپلز پارٹی اور مسلم لیگ (ق) کے رابطوں اور سر گرمیوں کے پیش نظر پاکستان تحریک انصاف بھی سیاسی طور پر متحرک ہو گئی ، چودھری پرویز الٰہی سے آئندہ کے اتحاد میں تاخیر کرنے کی بجائے پیشرفت کرنے کا فیصلہ کیا گیا ہے اور سیٹ ایڈ جسٹمنٹ کے لئے کمیٹی تشکیل دیدی گئی ہے ۔

تفصیلات کے مطابق عمران خان سے پارٹی کے مرکزی رہنمائوں نے ملاقات کی جس میں مسلم لیگ(ن)، پیپلز پارٹی اور مسلم لیگ(ق) کی سر گرمیوں کا جائزہ لیا گیا جبکہ چوہدری پرویز الٰہی کی جانب سے آئندہ کے اتحاد کیلئے کمیٹی کے قیام کیلئے پیشرفت کی گئی ہے ۔ذرائع کے مطابق چیئرمین پاکستان تحریک انصاف عمران خان نے چودھری پرویز الٰہی کے ساتھ سیٹ ایڈجسٹمنٹ کے لیے تین رکنی کمیٹی تشکیل دے دی۔کمیٹی میں سابق وفاقی وزرا ء شاہ محمود قریشی، فواد چودھری اور پرویز خٹک شامل ہیں جبکہ کمیٹی ابتدائی بات چیت کر کے کل منگل کے روز عمران خان سے سیٹ ایڈجسٹمنٹ کے حوالے سے مشاورت کرے گی۔ذرائع نے مزید بتایا ہے کہ (ق)لیگ کے ساتھ قومی و صوبائی اسمبلی میں 15 سے 20 سیٹوں پر ایڈجسٹمنٹ متوقع ہے جبکہ سیٹ ایڈجسٹمنٹ میں ان حلقوں کو ترجیح دی جائے گی جہاں سے (ق)لیگ جیتی تھی۔