اسلام آباد (آن لائن)چیف جسٹس آف پاکستان جسٹس عمر عطا بندیال کیساتھ کمانڈ اینڈ سٹاف کالج کوئٹہ کے وفد کی ملاقات۔ جمعہ کو عدالت عظمی سے جاری تفصیلات کے مطابق لیفٹیننٹ کرنل ہاشم اقبال باجوہ کی سربراہی میں کمانڈ اینڈ سٹاف کالج کوئٹہ کے ڈائریکٹنگ سٹاف اور ملٹری بیوروکریسی کورس کے بیس دوست ممالک کے شرکائ پر مشتمل 49 رکنی وفد نے یہاں سپریم کورٹ میں
چیف جسٹس عمر عطا بندیال سے ملاقات کی۔ چیف جسٹس آف پاکستان نے وفد کو خوش آمدید کہا اور انہیں اسلامی جمہوریہ پاکستان کے 1973 کے آئین سے متعلق آگاہ کیا۔ چیف جسٹس آف پاکستان نے وفد کو پارلیمنٹ، ایگزیکٹوز اور عدلیہ کے کردار اور اہمیت سے متعلق بھی بتایا۔ چیف جسٹس عمر عطا بندیال نے وفد کو عدالتی نظام،عدالتوں کے کام کاج، کردار، انصاف کی فراہمی اور سپریم کورٹ، ہائی کورٹس اور ضلعی عدالتوں کے آئینی دائرہ اختیار کے بارے میں بھی بتایا۔ چیف جسٹس آف پاکستان نے وفد کو آئین پاکستان میں درج بنیادی حقوق سے متعلق بھی آگاہ کیا۔ چیف جسٹس نے وفد کو بتایا کہ پاکستان میں مسلح افواج بہت اہم کردار ادا کرتی ہیں اور انہیں انتہائی عزت و احترام کی نگاہ سے دیکھا جاتا ہے کیونکہ افواج پاکستان ملکی قومی مفاد کے لیے اپنی جانوں کا نذرانہ پیش کرتے ہیں جبکہ سیلاب اور زلزلے جیسے خصوصی حالات میں شہریوں اور جمہوری اداروں کی مدد کے لیے بھی پیش پیش رہتی ہیں۔ اس موقع پر چیف جسٹس عمر عطا بندیال نے شرکائ کے سوالات کے جوابات بھی دیئے۔ وفد نے چیف جسٹس آف پاکستان کو جذبہ خیر سگالی کے طور پر یادگاری شیلڈ پیش کی جبکہ چیف جسٹس آف پاکستان نے بھی وفد کو شیلڈ پیش کی۔
