کراچی(این این آئی)فیڈرل بورڈ آف ریونیو(ایف بی آر)کے سابق چیئرمین شبر زیدی نے کہاہے کہ نجی یونیورسٹی میں میرے بیان کو غلط رپورٹ کیا جا رہا ہے۔سماجی رابطے کی ویب سائٹ ٹوئٹر پر اپنے بیان میں سابق چیئرمین ایف بی آر شبر زیدی نے کہاکہ میں نے صرف یہ بتایا

تھا کہ موجودہ کرنٹ اکائونٹ اور مالی خسارے کے معاملات دیوالیہ جیسی تشویش ناک صورت حال ظاہر کر رہے ہیں۔واضح رہے کہ شبر زیدی نے نجی کالج کی ایک تقریب سے خطاب میں کہا تھا کہ پاکستان دیوالیہ ہو چکا ہے، یہ غلط بات ہے کہ ملک بڑا اچھا چل رہا ہے۔ شبر زیدی نے کہاکہ ہم کہتے رہے ہیں کہ بہت اچھا ہے، بڑی اچھی چیزیں ہیں اور ملک بڑا اچھا چل رہا ہے، ہم نے بڑی کامیابی حاصل کرلی ہے اور تبدیلی لے آئے ہم مگر یہ سب غلط ہے۔انہوں کہاکہ میری رائے کے مطابق اس وقت ملک دیوالیہ ہوچکا، اکاونٹنگ کی اصطلاح میں ملک دیوالیہ ہوچکا۔ شبر زیدی نے کہاکہ جب آپ یہ طے کرلیں کہ ہم دیوالیہ ہوچکے ہیں اور اس سے آگے ہمیں چلنا ہے، یہ زیادہ بہتر ہے بہ نسبت اس کے کہ آپ کہیں کہ ملک اچھا چل رہا ہے، میں یہ کردوں گا، میں وہ کردوں گا، یہ سب لوگوں کو دھوکا دینے والی باتیں ہیں۔انہوں نے کہاکہ برآمدات بڑھانے کی حکمت عملی ہی غلط ہے، جب تک پورٹ کے قریب صنعتیں نہیں لگیں گی، ایکسپورٹ نہیں بڑھے گی۔ واضح رہے کہ شبر زیدی وزیراعظم عمران خان کی حکومت میں 10 مئی 2019 سے 8اپریل 2020تک چیئرمین ایف بی آر رہے۔