اسلام آباد (مانیٹرنگ ڈیسک ، این این آئی) پاکستان پیپلز پارٹی کے رہنما سینیٹر سلیم مانڈوی والا کا کہنا ہے کہ چین نے پاور پلانٹس کی پیمنٹ ادا ہونے تک کام کرنے سے منع کردیا ہے، سی پیک منصوبوں کوعملی طور پر بریک لگ چکی ہے۔نجی ٹی وی کے مطابق سینیٹ کی قائمہ

کمیٹی برائے منصوبہ بندی کا اجلاس چیئرمین سلیم مانڈوی والا کی زیر صدارت ہوا۔ اس کے بعد میڈیا سے غیر رسمی گفتگو کرتے ہوئے سلیم مانڈوی والا نے بتایا کہ چینی کمپنیوں کی جانب سے تحفظات کا اظہار کیا جا رہا ہے۔ چینی کمپنیوں نے مسائل حل نہ ہونے کی شکایت کی ہے، قائمہ کمیٹی سی پیک منصوبوں پر پیشرفت کا جائزہ لینے 21 اکتوبر کو گوادر جائے گی ،انہوں نے کہا کہ  جوائنٹ کو آرڈی نیشن کمیٹی (جے سی سی) میں چین نے واضح کیا ہے کہ پاور پراجیکٹس کی پیمنٹ تک کوئی کام نہیں ہوگا، ایم ایل ون سمیت سب کچھ ہولڈ کردیا گیا ہے، سی پیک کو عملی طور پر بریک لگ چکی ہے۔ دوسری جانب پاکستان میں چین کے سفیر نونگ رونگ نے کہا ہے کہ جھنگ میں ترمو ہیڈ ورکس کے قریب کمبائنڈ سائیکل پاور پلانٹ پر کام تیزی سے جاری ہے، منصوبہ جلد مکمل ہو جائے گا۔ اپنے بیان میں انہوں نے کہا کہ 1263 میگاواٹ کے آر ایل این جی پاور پلانٹ پر ایک چینی کمپنی کام کر رہی ہے اور اس منصوبے پر کام میں کوویڈ انیس وبا کے باوجود کوئی رکاوٹ نہیں آئی۔اس منصوبے سے 30 سال کے عرصے کے دوران قومی خزانے کو اربوں روپے کی ایندھن کی مد میں بچت ہوگی۔

موضوعات:سی پیک