طور خم (این این آئی)طالبان نے طورخم سرحد پر امدادی ٹرک سے پاکستانی پرچم اتارنے کے معاملے پر سخت کارروائی کرتے ہوئے سرحد پر تعینات نفری اور کمانڈر تبدیل کردیا۔
تفصیلات کے مطابق گزشتہ دنوں پاک افغان سرحد طورخم پر طالبان جنگجوؤں کی جانب سے امدادی سامان لیکر جانے والے ٹرک سے پاکستانی پرچم اتارنے کا واقعہ پیش آیا تھا۔واقعہ کے بعد افغانستان کے نائب وزیر اطلاعات ذبیح اللہ مجاہد کا کہنا تھاکہ جس نے طورخم پر پاکستانی امدادی سامان کی گاڑی سے پاکستانی قومی پرچم اتار کر اس کی بے حرمتی کی ہے، ان کی گرفتاری اور غیر مسلح کرنے کا حکم جاری کردیا گیا ہے۔طالبان نے واقعے پر مزید کارروائی کی ہے۔ ذرائع کے مطابق طالبان قیادت نے سرحد پر تعینات نفری اورطالبان کمانڈر تبدیل کردیا ہے۔ ذرائع نے بتایا کہ نئے طالبان کمانڈر سمیت 60 سے زائد نفری نے پوزیشن سنبھال لی۔خیال رہے کہ پرچم اتارنے کے واقعے پر سوشل میڈیا صارفین نے شدید غم و غصے کا اظہار کیا تھا۔
