اسلام آباد (مانیٹرنگ ڈیسک /این این آئی)طور خم بارڈر پر پاکستانی پرچم کی بے حرمتی کرنے والے طالبان جنگجوئوں کو گرفتار کوکر لیا گیا ۔ غیرملکی میڈیا رپورٹس کے مطابق طالبان ترجمان ذبیح اللہ مجاہد نے کہا ہے کہ گزشتہ روز طور خم بارڈر پر امدادی ٹرک سے پاکستانی پرچم اتارکر بے حرمتی کرنے والے طالبان جنگجوئوں کو گرفتار کر کے انہیں غیر مسلح کر دیا گیا ہے

۔ ذبیح اللہ مجاہد کا کہنا تھا کہ کسی کو اجازت نہیں دیں کہ وہ کسی بھی جھنڈے کی توہین کرے ، جھنڈے کی توہین کا مطلب قوم کی توہین کرنا ہے ۔ ترجمان طالبان کے مطابق پاکستانی پرچم اتارنے والوں کو سخت سزا دے جائے گی ۔ واضح رہے کہ گزشتہ روز ترجمان طالبان ذبیح اللہ مجاہد نے کہا ہے کہ ٹرک سے پاکستانی پرچم اتارنے میں ملوث عناصر کو سخت سے سخت سزا دی جائے گی۔برطانوی نشریاتی ادارے (بی بی سی) کے مطابق طالبان کی جانب سے پاکستان سے جانے والے ٹرک سے پرچم اتارے جانے کی وائرل ویڈیو پر رد عمل دیتے ہوئے افغان طالبان کے ترجمان ذبیح اللہ مجاہد نے کہا کہ اس واقعے پر پوری طالبان قیادت غصے میں ہے لہذا اس میں ملوث افراد کو جلد ہی گرفتار کیا جائے گا اور سخت سے سخت سزا دے جائے گی۔ذبیح اللہ مجاہد نے پاک افغان طورخم سرحد پر پاکستان سے افغانستان جانے والے امدادی سامان کے ٹرک سے پاکستان کا جھنڈا اتارے جانے کو بدترین واقعہ قرار دیتے ہوئے کہا کہ ہم اس کی مذمت کرتے ہیں اور کوشش کریں گے کہ اس طرح کا واقعہ دوبارہ رونما نہ ہو۔واضح رہے سوشل میڈیا پر ایک ویڈیو وائرل ہورہی ہے جس میں دیکھا جاسکتا ہے کہ پاک افغان تعاون فورم کی جانب سے افغانستان کے لیے امدادی سامان سے بھرے کچھ ٹرک افغانستان بھیجے جاتے ہیں لیکن جیسے ہی یہ ٹرک طورخم سرحد عبور کرنے کے بعد افغانستان کی حدود میں داخل ہوتے ہیں تو وہاں موجود افغان طالبان ٹرک کو روک کر اس پر پر لگے پاکستانی پرچم اتاردیتے ہیں۔