اسلام آباد (مانیٹرنگ ڈیسک )افغان طالبان کی جانب سے افغانستان کی نئی حکومت کے قیام کا اعلان 11سمتبر کو کیا جائے گا ۔ تفصیلات کے مطابق ٹویٹر پیغام میں افغان طالبان نے فتح کی تاریخیں شیئر کی ہیں جن کے مطابق 15اگست کو کابل فتح ، 6ستمبر کو پنج شیر فتح کیا اور 11ستمبر کو افغانستان کی نئی حکومت کا اعلان کریں گے ۔ دریں اثنا افغان میڈیا کے مطابق کابل میں نئی حکومت کے

اعلان کی تقریب جلد ہو گی ،نئی حکومت کی تشکیل میں طالبان نے پاکستان ، چین، روس، ایران، ترکی اور قطر کو شرکت کی دعوت دی ہے۔ افغان میڈیا نے یہ بھی دعوی کیا ہے کہ نئی حکومت کے لیے بات چیت مکمل ہو گئی ہے۔ جبکہ اس سلسلے میں جلد تاریخ کا اعلان کیا جائے گا۔ دوسری جانب طالبان کی جانب سے پنج شیر مکمل فتح کرنے کا اعلان کر دیا گیا ۔  طالبان نے پنجشیر کا کنٹرول سنبھالنے کے بعد کلمے والا پرچم پنجشیر کے گورنر ہائوس پر لہرا دیا ۔ اس حوالے سے ترجمان طالبان ذبیح اللہ مجاہد نے کہا ہے کہ طالبان کا پنج شیر پر مکمل کنٹرول ہے ۔ افغان اردو کے مطابق ذبیح اللہ مجاہد نے کہا ہے کہ پنجشیر کا مسئلہ مذاکرات اور افہام و تفہیم سے حل کرنے کی کوشش کی لیکن دوسرے فریق کی جانب سے مسلسل انکار کے بعد جنگ کے ذریعے حل کے سوا کوئی چارہ نہیں تھا۔ انکا مزید کہنا تھا کہ افغانستان میں جنگ کا خاتمہ ہو گیا ۔ پنجشیر اب حکومتی کنٹرول میں ہے۔قبل ازیں افغانستان کے صوبہ پنجشیر میں طالبان سے جھڑپ میں مزاحمتی فورس کے ترجمان فہیم دشتی جاں بحق ہوگئے۔گزشتہ کئی روز سے پنجشیر میں طالبان اور مزاحمتی فورس کے درمیان جنگ جاری ہے جبکہ طالبان کی جانب سے آج صوبے کے تمام اضلاع پر کنٹرول کا دعویٰ کیا گیا ہے۔افغان میڈیا رپورٹس کے مطابق وادی پنجشیر میں طالبان سے جھڑپ میں مزاحمتی فورس کے ترجمان فہیم دشتی مارے گئے۔افغان میڈیا کے مطابق پنج شیر کی مقامی ملیشیا کا ترجمان فہیم دشتی طالبان کے ساتھ جھڑپوں میں ہلاک ہو گیا،فہیم دشتی ڈاکٹر عبداللہ عبداللہ کے بھانجے ہیں ،مراحتمی فورس نے بھی فہیم دشتی کی ہلاکت کی تصدیق کردی۔دوسری جانب مزاحتمی فورس کا اہم کمانڈرجنرل عبدالودود بھی طالبان کے ساتھ جھڑپوں میں مارا گیا۔افغان میڈیا رپورٹس میں مزاحمتی فورس کے دیگر اہم کمانڈرز کی بھی ہلاکت کا دعویٰ کیا گیا ہے۔قبل ازیں طالبان مخالف قومی مزاحمتی فورس کے سربراہ احمد مسعود نے جنگ روکنے کی مشروط پیشکش کی تھی۔