لاہور( این این آئی)وزیر مملکت برائے اطلاعات و نشریات فرخ حبیب نے کہا ہے کہ وزیر اعظم عمران خان نے آزاد کشمیر، گلگت بلتستان، خیبرپختونخوا ہ اور بلوچستان کی صوبائی حکومتوں کو بھی آب پاک اتھارٹی کی طرز پینے کا صاف پانی فراہم کرنے کی ہدایت کی ہے،پنجاب کی بارہ کروڑ آبادی کوپینے کا صاف پانی مہیا کیا جائے گا،36 اضلاع میں 4 ارب روپے کی
لاگت سے 1500 پینے کے صاف پانی کے پلانٹ لگائے جا رہے ہیں جن کی دسمبر 2021 میںتکمیل ہو جائے گی۔وزیر اعظم عمران خان کی زیر صدارت گورنر ہائوس لاہور میں آب پاک اتھارٹی اجلاس کے بعد میڈیا کو بریفنگ دیتے ہوئے وزیر مملکت فرخ حبیب نے کہا کہ شہبازشریف کے دور میں صاف پانی کمپنی وعدوں، نعروں اور دعوئوں کے علاوہ کچھ نہیں تھی،شہباز شریف کے دور میں ساڑھے 7ارب روپے کی لاگت سے صرف 116 واٹر فلٹریشن پلانٹس لگائے گئے،شہباز شریف کے دور میں ایک واٹر فلٹریشن پلانٹ پر 6 کروڑ 40 لاکھ روپے لاگت آئی،آب پاک اتھارٹی کے تحت ایک واٹر فلٹریشن پلانٹ پر صرف 30 لاکھ روپے لاگت آئے گی۔ انہوںنے کہا کہ آب پاک اتھارٹی کے اگلے فیز میں ساتھ پنجاب اور فیصل آباد ڈویژن کے ایک ہزار گائوں میں جہاں کڑوا پانی ہے وہاں پینے کے صاف پانی کے آب پاک مراکز قائم کئے جائیں گے،پنجاب میں نئے فلٹریشن پلانٹس آب پاک اتھارٹی کے زیرنگرانی لگائے جارہے ہیں،کڑوے پانی والے علاقوں میں ایک ہزار پینے کے صاف پانی کے پلانٹ لگائے جارہے ہیں۔ انہوںنے کہا کہ وزیراعظم عمران خان نے پینے کے صاف پانی کو شہریوں کی دہلیز پر فراہم کرنے کی ہدایت کی ہے،پینے کے صاف پانی کی فراہمی سے پانی سے پھیلنے والی بیماریوں سے پیشگی بچا ئوممکن ہوگا۔ انہوں نے بتایا کہ وزیراعظم عمران خان آج مینگروز کے علاقوں کا بھی دورہ کرینگے،وزیر اعظم عمران خان تحفظ ماحولیات کے حوالے سے دنیا بھر میں مرکز نگاہ ہیں۔
