اسلام آباد (مانیٹرنگ ڈیسک/این این آئی )چین نے ووہان شہر کے تمام باشندوں کے کرونا وائرس ٹیسٹ کرنے کا فیصلہ کیا ہے۔غیر ملکی میڈیا کے مطابق
چینی شہر ووہان کے حکام کا کہنا ہے کہ شہر کی تمام آبادی کے کرونا ٹیسٹ کرنے کا فیصلہ کیا گیا ہے۔یہی وہ شہر ہے جہاں 2019ء میں کرونا وائرس کا پہلا کیس سامنے آیا تھا۔ حکام کے مطابق ایک کروڑ 10 لاکھ آبادی والے شہر میں تیزی سے جامع ٹیسٹنگ شروع کررہے ہیں۔ دوسری جانب ادھر پاکستانی حکومت نے بڑی تعداد میں کورونا ویکسین درآمد کرنے کا فیصلہ کرلیا۔ وزرات صحت کے حکام کے مطابق رواں ماہ 3کروڑ50 لاکھ ویکسین کی خوراکیں درآمد کی جائیں گی۔حکام نے کہا ہے کہ ویکسین کی مسلسل فراہمی برقرار رکھنے کیلئے اقدامات کیے جائیں گے۔خیال رہے کہ ملک میں کورونا کیسز میں اضافے کے ساتھ ہی ویکسینیشن کیلئے بھی عوام کا رش لگ گیا ہے اور گزشتہ روز ملک میں یومیہ ویکسین لگانے کا نیاریکارڈ بن گیا ہے۔گزشتہ روز ملک بھر میں 10 لاکھ 72 ہزار 342 افراد کو ویکسین لگائی گئی۔
