لاہور(این این آئی)وفاقی وزیر تعلیم شفقت محمود نے کہا ہے کہ تعلیم کا پہلے ہی بہت نقصان ہوچکا ہے،امتحان منسوخ نہیں ہوں گے، طالب علم پڑھائی جاری رکھیں ادھر اُدھر کی باتوں پر دھیان نہ دیں،گزشتہ سال بھی تعلیم کا بہت حرج ہوا، بہت دیر تک سکول بند رہے، بہت ساری کمی کو پورا کرنا ہے، سکول کھولنے کا فیصلہ صوبوں پر ہے،
پچھلے سال جو امتحان ملتوی کئے گئے سب بچوں کو پاس کیا، اس سال سب صوبائی وزرا ء نے فیصلہ کیا امتحانات ہوں گے۔ ان خیالات کا اظہارانہوں نے فرزانہ عاقب کی شاعری کی کتاب کی تقریب رونمائی کے موقع پر خطاب اور میڈیا سے گفتگوکرتے ہوئے کیا۔ شفقت محمود نے کہا کہ فیسوں کا معاملہ پنجاب حکومت دیکھے گی، یہ طے ہے کہ امتحانات ملتوی نہیں ہوں گے، طالب علم اس امید پر ہیں کہ امتحان کینسل ہوں گے، صحت کو خطرے میں ڈالے بنا جس قدر ممکن ہو سکول کھلنے چاہئیں،تعلیم کا پہلے ہی بہت نقصان ہوچکا ہے، طالب علموں کو کہوں گا کہ ڈیٹ شیٹ کے مطابق ہی امتحان ہوں گے اس لئے اپنی پڑھائی جاری رکھیں۔جو پڑھائی اسکول میں ہو سکتی ہے وہ آن لائن نہیں ہو سکتی،بچوں کی صحت کو نقصان پہنچائے بغیر تعلیم کے نقصان کو پورا کرنا ہے۔انہوں نے کہا کہ صوبوں کو مکمل اختیار ہے کہ چھٹیاں کریں یا نا کریں،اس دفعہ غیر معمولی حالات ہیں اب سکولوں کو کھلنا چاہیے۔فرزانہ عاقب نے اپنی کتابوں کا حوالہ دیتے ہوئے کہا کہ میرے پانچ بچے ہیں جن میں تین انگریز اور دو اردو ہیں،بیس بائیس برس سے ادب سے منسلک ہوں،کینیڈا سے تعلیم حاصل کی،اردو میں ہمارے پاس بہت سے جوہر نایاب ہیں،میں پاکستان کو انگریزی شاعری میں رواج دوں گی۔ اس موقع پر سابق کرکٹرعاقب جاوید سمیت دیگر نے بھی خطاب کیا۔
