سڈنی، لاہور (یواین پی)آسٹریلیا کے فاسٹ بالر پیٹ کمنز نے کہا ہے کہ پاکستان کرکٹ ٹیم کے کپتان بابر اعظم مشکل ترین بیٹسمین ہیں جن کو میں نے بالنگ کرائی۔آئی سی سی ٹیسٹ رینکنگ میں نمبر ون بالر پیٹ کمنز نے ایک انٹرویو میں کہا کہ ہر ٹیم میں ایک دو کھلاڑی ہوتے ہیں جن کو بالنگ کرانا مشکل ترین ہوتا ہے اور بابر اعظم ان میں سے ایک ہے۔

پیٹ کمنز نے مزید کہا کہ ایسے کھلاڑی دنیا میں بہترین کھلاڑی ہوتے ہیں کیونکہ ان کی کوئی کمزوری نہیں ہوتی۔ ہر ٹیم میں ایک دو ایسے بیٹسمین ہوتے ہیں جن کو گیند کرانا مشکل کام ہوتا ہے لیکن آپ کو ایسے چیلنجز کا سامنا کرنا چاہئے کیونکہ اس سے ملنے والی کامیابی فائدہ مند ہوتی ہے۔انہوں نے بھارت،انگلینڈ،نیوزی لینڈ اور جنوبی افریقا کے کھلاڑیوں کو بھی مشکل قرار دیا۔واضح رہے کہ انٹرنیشنل کرکٹ کونسل (آئی سی سی) نے ون ڈے کرکٹ کی نئی پلیئرز رینکنگ جاری کردی ہے جس کی بیٹسمینوں کی فہرست میں پاکستانی کپتان بابر اعظم بدستور پہلی پوزیشن پر موجود ہیں۔دوسری جانب قومی کرکٹرز کے سنٹرل کنٹریکٹس کا اعلان دورہ انگلینڈ سے قبل کیا جانے کا امکان ہے، قومی کرکٹرز کے سنٹرل کنٹریکٹس 30 جون کو ختم ہو رہے ہیں۔ ذرائع کا کہنا ہے کہ نئے سنٹرل کنٹریکٹس کی مدت یکم جولائی سے شروع ہو گی، سنٹرل کنٹریکٹ میں بڑے پیمانے پر تبدیلیوں کا امکان ہے جس پر مشاورت جاری ہے۔

ہیڈکوچ، چیف سلیکٹر، ڈائریکٹر انٹرنیشنل اور چیف ایگزیکٹو کے درمیان مشاورت جاری ہے۔ذرائع کا بتانا ہے کہ کئی کرکٹرز کو دوبارہ کنٹریکٹس میں شامل کیا جائے گا، حسن علی اور فہیم اشرف کو کنٹریکٹس کی پیشکش کی جائے گی، حسن علی کو بی کیٹیگری میں شامل کیا جائے گا۔ذرائع کا کہنا ہے کہ فخرزمان کوبی،حارث رؤف اورمحمد حسنین کو سی کیٹیگری مل سکتی ہے، اظہرعلی ایک فارمیٹ کی وجہ سے بی میں آسکتے ہیں، محمد حفیظ کو بھی پیشکش ہوگی۔ فواد عالم کی بی کیٹیگری میں ترقی ہوسکتی ہے جبکہ اسد شفیق، شان مسعود اور حارث سہیل کی تنزلی کا امکان ہے۔

موضوعات:بابر اعظم