لاہور(این این آئی) گور نر پنجاب چوہدری محمد سرور کی وزیر اعظم عمران خان سے ملاقات ‘پنجاب کی سیاسی صورتحال ‘حکومتی امور اور پنجاب آب پاک اتھارٹی سمیت دیگر امور پر بات چیت کی گئی۔’وزیر اعظم عمران خان نے پنجاب میں پینے کے صاف پانی کی فراہمی کیلئے گورنر پنجاب کو ہنگامی بنیادوں پر اقدامات کی ہدایت کردی۔تفصیلات کے مطابق بدھ کے روز گورنر پنجاب چوہدری محمد سرور نے وزیر اعظم عمران خان سے اسلام آباد میں ملاقات کی جہاں گورنر پنجاب چوہدری محمد سرور نے وزیراعظم عمران خان کو ”پنجاب آب پاک اتھارٹی”کے قیام اور ‘اپنے غیر ملکی دورے میں امر یکی سینیٹرز سمیت دیگر
سے ہونیوالی ملاقاتوں کے بارے میں بھی بتایا جس پر وزیر اعظم عمران خان نے پنجاب کے عوام کو جلد ازجلد پینے کے صاف پانی کی فراہمی کیلئے تمام وسائل بروئیکار لانے اور ہنگامی بنیادوں پر اقدامات کرنے کی ہدایت کردی۔ جس پرگورنر پنجاب چوہدری محمدسرور نے وزیر اعظم عمران خان کو بتایا کہ پنجاب آب پاک اتھارٹی کے بورڈ سمیت دیگر معاملات پر ہنگامی بنیادوں پر اقدامات کیے جا رہے ہیں پنجاب آب پاک اتھارٹی کے تمام معاملات کو مکمل طور پرشفاف بنانے کیلئے باقاعدہ حکمت عملی تیار کر لی گئی اور انشا اللہ پنجاب آب پاک اتھارٹی کے ذریعے ایک ایک پیسہ پنجاب کے عوام کو پینے کے صاف پانی پر خرچ کیا جائیگا۔
