لاہور (آن لائن) سانحہ ماڈل ٹاؤن کی نئے سرے سے تحقیقات کرنے والی جے آئی ٹی نے سانحہ ماڈل ٹاؤن کے مقدمہ میں نامزد ملزم سابق وزیر اعظم نواز شریف کا بیان قلم بند کر دیا ہے۔ ذرائع کے مطابق سینئر پولیس افسر اے ڈی خواجہ کی سربراہی میں نئی جے آئی ٹی کی ٹیم سابق وزیر اعظم کا بیان قلمبند کرنے کے لئے بدھ کی صبح کوٹ لکھپت جیل گئی۔ جہاں جے آئی ٹی نے سپرنٹنڈنٹ جیل کے کمرے میں دو گھنٹے تک نواز شریف سے پوچھ گچھ کی اور ان کا بیان
قلمبند کیا۔ واضح رہے کہ مذکورہ سانحہ میں جے آئی ٹی اب تک سابق صوبائی وزیر قانون رانا ثناء اللہ سابق وزیر اعلیٰ پنجاب شہباز شریف، سابق وفاقی وزیر اطلاعات پرویز رشید سمیت 90 پولیس افسران اور اہلکاروں کے علاوہ پاکستان عوامی تحریک کے 84 عینی شاہدین کے بیانات قلمبند کر چکی ہے جبکہ سابق وفاقی وزیر ریلوے خواجہ سعد رفیق کا بیان قلمبند کیا جانا باقی ہے۔ ان کا بیان ریکارڈ کرنے کے بعد جے آئی ٹی 31 مارچ کو اپنی رپورٹ عدالت میں پیش کرے گی۔
