لاہور ( این این آئی)پنجاب حکومت نے امسال ممکنہ بھاری بارشوں اور سیلاب سے بچاؤ کیلئے خصوصی اور بھرپور تیاری کرنے کا فیصلہ کیا ہے ۔صوبائی وزیر ڈیزاسٹر مینجمنٹ میاں خالد محمود کی زیر صدارت اعلیٰ سطحی اجلاس میں مون سون سیزن کے لیے بڑے پیمانے پر انتظامات کا جائزہ لیا گیا جس میں فیصلہ کیا گیا کہ 10اپریل تک تمام متعلقہ محکموں سے انتظامات کی تفصیل حاصل کی جائے گی

جبکہ پنجاب کے ہر ضلع میں کسی بھی ناگہانی صورتحال سے نمٹنے کیلئے ضلعی انتظامیہ چوکس رہے گی ، صوبائی وزیر میاں خالد محمود نے ہدایت کی کہ جنوبی پنجاب کے اُن اضلاع کیلئے خصوصی انتظامات یقینی بنائے جائیں جو گزشتہ سیلاب میں بری طرح متاثر ہوئے تھے اور جہاں دوبارہ دریا کے کٹاؤ سے حالات خراب ہونے کا خدشہ ہے ،صوبائی وزیر نے پنجاب ڈیزاسٹر مینجمنٹ اتھارٹی کو آئندہ مون سون سیزن کیلئے ابھی سے تفصیلی سفارشات مرتب کرنے کا حکم دیا اور اپنے وئیر ہاؤسز اور دیگر امور ان آرڈر کرنے کی ہدایت کی ، میاں خالد محمود نے کہا کہ ہمیں ہر قسم کے حالات کا سامنا کرنے کیلئے ٹھوس بنیادوں پر اقدامات کو یقینی بنانا ہوگا ،انسانی جانوں و مال کے نقصان کو بچانا کسی بھی حکومت کی اولین ذمہ داری ہوتی ہے اس کیلئے ضروری ہے کہ اتھارٹی ہر ضلع میں مقامی پلان تشکیل دے تاکہ ریلیف کے سامان کو بر وقت اور کم سے کم اخراجات کے ذریعے لوگوں تک پہنچایا جا سکے ،صوبائی وزیر میاں خالد محمود نے سیلاب کی صورت میں پینے کے وافر پانی کی فراہمی اور مزید واٹر براؤزرز کو یقینی بنانے کی ہدایت کی۔اس بریفنگ اجلاس میں ڈی جی پنجاب ڈیزاسٹر مینجمنٹ اتھارٹی راشد احمد خان نے بریفنگ دیتے ہوئے بتایا کہ15جون سے15اکتوبر تک صوبے میں ہنگامی حالت کے باعث ہائی الرٹ رہے گا ،تمام متعلقہ محکموں کو لوپ میں لیا جائے گااورسیلاب یابارشوں کی شکل میں ہنگامی حالت پر پنجاب بھر میں فوری ریلیف کی فراہمی کو یقینی بنایا جائے گا ، انہوں نے اتھارٹی کے انتظامی و دیگر امور کے بارے میں بھی صوبائی وزیر میاں خالد محمود کو تفصیلی بریفنگ دیتے ہوئے یقین دلایا کہ اس سال پیش بندی کرتے ہوئے ایک ماہ قبل ہی تمام انتظامات مکمل کیے جا رہے ہیں ۔