کراچی(این این آئی)آئی جی سندھ پولیس ڈاکٹرسید کلیم امام نے کہاہے کہ پاکستان کی بہادر خاتون آفیسر ایس پی سہائے عزیز نے اپنے اعضا عطیہ کرنے کا فیصلہ کیاہے۔جمعہ کوخواتین کے عالمی دن کے موقع پر منعقدہ تقریب سے خطاب کرتے ہوئے انہوں نے خواتین کو مزید مضبوط اور با اختیار بنانے کے عزم کا اظہار کرتے ہوئے کہاکہ پولیس کانسٹیبلز کم کرکے اے ایس آئی کی سیٹیں بڑھائیں گے جب کہ کیئر سینٹر بھی بنائیں گے جہاں خواتین اہلکاروں کے لیے روم ہوں گے۔ آئی جی سندھ نے کہا
سندھ پولیس میں پہلی بار خاتون افسر نے اپنے اعضا عطیہ کرنے کا فیصلہ کیا ہے، انہوں نے کہا ایس پی سہائے عزیز نے ایس آئی یو ٹی کو اپنے اعضا عطیہ کرنے کا فیصلہ کیا ہے۔آئی جی سندھ نے کہا کہ خواتین پولیس اہلکاروں کی آمد و رفت میں سہولت کے لیے شٹل سروس بھی چلائی گئی ہے، خواتین اہلکاروں نے پی ایس ایل میچز کے دوران اچھی طرح ڈیوٹی کرنی ہے، مہمانوں کی حفاظت یقینی ہو تاکہ انہیں معلوم ہو کتنی محنت کی جارہی ہے۔
