اسلام آباد(مانیٹرنگ ڈیسک) لاہور ہائیکورٹ نے پنجاب اسمبلی میں اپوزیشن لیڈر اور ن لیگ کے رہنما حمزہ شہباز کے گھر کے باہر سکیورٹی رکاوٹیں ہٹانے کا حکم دیدیا۔ میڈیا رپورٹس کے مطابق لاہور ہائیکورٹ میں آج حمزہ شہباز کے گھر کے باہر رکاوٹیں ہٹانے کیلئے درخواست کی سماعت ہوئی، جسٹس علی اکبر قریشی نے سماعت کی۔ درخواست گزار اظہر صدیق ایڈووکیٹ نے استدعا کی کہ حمزہ شہباز شریف نے سکیورٹی کے نام پر اپنے گھر کے
ارد گرد رکاوٹیں کھڑی کررکھی ہیں جس سے علاقے کے مکینوں کو پریشانی ہے، سکیورٹی کے نام پر سڑک کو بلاک نہیں کیا جاسکتا، عدالت ان رکاوٹوں کو ہٹانے کا حکم دے۔اس موقع پر عدالت میں رکاوٹوں کی تصاویر بھی پیش کی گئیں۔ عدالت نے حمزہ شہباز کے گھر کے باہر سے سکیورٹی کے نام پر رکاوٹیں ہٹانے کا حکم جاری کرتے ہوئے آئی جی پنجاب اور سی سی پی او سے 25ستمبر تک حکم پر عملدرآمد رپورٹ طلب کر لی۔
