لاہور( این این آئی ) صوبائی وزیر ایکسائز اینڈٹیکسیشن و نارکوٹیکس کنٹرول حافظ ممتاز احمد نے کہا ہے کہ محکمہ ایکسائز میں کرپشن کے خاتمے کیلئے آن لائن سسٹم متعارف کرایا جا رہا ہے ۔ آٹو مشین محکموں کو جدید تقاضوں سے ہم آہنگ کرنے کے ساتھ ساتھ اس کی کارکردگی کو بھی بہتر بنائے گی ۔ان خیالات کا اظہار انہوں نے پی آئی اے سوسائٹی لاہور میں دوسرے ایکسائز سروس سنٹر کے افتتاح کے موقع پر کیا۔
صوبائی وزیر نے کہا کہ محکمہ ایکسائز اپنے محدود وسائل میں عوام کو بہترین سہولیات کی فراہمی کو یقینی بنارہا ہے ۔ اس ضمن میں دور دراز علاقوں میں ایکسائز سروس سنٹر ز قائم کیے جا رہے ہیںتا کہ لوگوں کو ان کے گھر کی دلیز پر سروسز فراہم کی جا سکیں۔تقریب میں سیکرٹری ایکسائز اینڈ ٹیکسیشن بابر شفیع، ڈائریکٹرجنرل محمداکرم اشرف گوندل، ڈائریکٹر ریجن اے اینڈ سی لاہور اور انچارج سروس سنٹرز پنجاب رضوان اکرم شیروانی کے علاوہ ای ٹی او ذوالفقار بٹ نے بھی شرکت کی ۔ اس موقع پرانچارج سروس سنٹرز پنجاب رضوان اکرم شیروانی نے بریفنگ دیتے ہوئے بتایا کہ لاہور میں 4 ایکسائزسروس سنٹر ز کے علاوہ گوجرانوالہ ، ملتان ، فیصل آباد ، راولپنڈی اور بہاولپور میں بھی ایک ایک سروس سنٹر قائم کیا جائے گا۔ آج جمعہ کو پی آئی اے سو سائٹی لاہور میں ایکسائز سروس سنٹر کا افتتاح ہو رہا ہے جبکہ ڈیفنس ہائوسنگ اتھارٹی میں ایک سروس سنٹرکا افتتاح پہلے ہی ہو گیا ہے ۔اس کے علاوہ باغبانپورہ اور شاہدرہ سنٹر ز کا افتتاح بھی جلد متوقع ہے ۔ انہوں نے کہا کہ پہلی بارایکسائز سروس سنٹر (پی آئی اے سو سائٹی لاہور) میں لوگوں کی سہولت کیلئے اپوائنمنٹ مینجمنٹ سسٹم متعارف کروایا گیا ہے۔قبل ازاں صوبائی وزیر ایکسائز اینڈٹیکسیشن و نارکوٹیکس کنٹرول حافظ ممتاز احمد نے آج منسٹرز بلاک لاہور میں پاکستان ایتھنل مینوفیکچرنگ ایسوسی ایشن پنجاب زون کے چار رکنی وفد سے ملاقات کی ۔ملاقات میں ہارون اختر ،شیخ محمد سعید ،چوہدری محمد وحید ، جاوید کیانی کے علاوہ
سیکرٹری ایکسائز اینڈ ٹیکسیشن بابر شفیع بھی موجو د تھے ۔ وفد کے اراکین نے صوبائی وزیر کو پنجاب میں اس انڈسٹری کو پیش آنے والی روکاوٹو ں اور مسائل سے آگاہ کیا۔ انہوں نے کہا کہ حکومت پنجاب نے سپرٹ کی پیداور پر 2 روپے فی لیٹرحساب سے ٹیکس لگایا ہے جو کہ پاکستان کے کسی بھی دوسرے صوبے میںرائج نہیں ہے اور اس سے ہماری برآمدات متاثر ہوئی ہیں۔ صوبائی وزیر حافظ ممتا زنے وفد کے اراکین کو یقین دلایا کہ اس انڈسٹری سے متعلقہ مسائل کو حل کرنے پر سنجیدگی سے غور کیا جائیگا ۔
