لاہور(نیوزڈیسک)۔ فلمسٹار نور نے کہا ہے کہ بچپن میں پائلٹ بننے کے خواب دیکھتی تھی مگر قسمت مجھے شوبز کی دنیا میں لے آئی ، آج پاک فضائیہ میں خواتین پائلٹ کی شمولیت سے ایک خاتون ہونے کی حیثیت سے خود پر بڑا فخر محسوس کرتی ہوں ۔خصوصی گفتگو کرتے ہوئے انہوں نے کہا کہ پاکستان میں خواتین تعلیم کے زیور سے آراستہ ہوکر زندگی کے ہر شعبے میں اپنی صلاحیتوں کا لوہا منوا رہی ہیں ۔پاکستان میں بالخصوص دیہی علاقوں میں بچیوں کی تعلیم کو یقینی بنانے کے لئے حکومتوں کو انقلابی اقدامات اٹھانے ہوں گے ۔
ایک سوال کے جواب میں فلمسٹار نور نے کہا کہ میں خود تو اعلیٰ تعلیم حاصل نہیں کر سکی مگر اپنی بیٹی کو اعلیٰ تعلیم یافتہ اور ایک مثالی انسان کے طور پر دیکھنے کی خواہشمند ہوں ۔ان کا کہنا تھا کہ اپنی بیٹی پر کبھی اپنی مرضی مصلحت نہیں کروں گی البتہ ایک ماں ہونے کی حیثیت سے جو بھی اس کے لئے بہتر ہو گا اس کا مشورہ ضرور دوں گی ۔