ممبئی(نیوز ڈیسک) بالی ووڈ اداکار شاہ رخ خان اور اجے دیوگن کے درمیان دونوں کے کیریئر کے آغاز سے ہی سرد جنگ چل رہی ہے تاہم اب یہ سرد جنگ دوستی میں بدلتی دکھائی دے رہی ہے، شاہ رخ اور اجے دیوگن کو پہلی بار ایک ساتھ دیکھا گیا ہے، دونوں بلغاریہ کے ایک ریسٹورنٹ میں ایک ساتھ کھانا کھا رہے ہیں۔شاہ رخ خان اور اجے دیوگن کی سرد جنگ کا آغاز 1994 میں فلم کرن ارجن سے ہوا تھا، پہلے اس فلم میں شاہ رخ خان اور اجے دیوگن کو اہم کردار ملے تھے لیکن جب اجے کی جگہ سلمان خان کو کردار دیا گیا تو اجے دیوگن کا یہ ماننا تھا کہ ایسا شاہ رخ خان کی وجہ سے ہوا۔ اس کے بعد دونوں کے درمیان کبھی دوستی یا ملاقات کی خبریں سامنے نہ آئیں۔ شاہ رخ خان کی بالی ووڈ میں سب سے گہری دوستی کاجول سے ہے لیکن کاجول کی اجے دیوگن سے شادی بھی دونوں کے درمیان دوریاں کم نہ کر پائی۔ دو سال قبل شاہ رخ خان اور اجے دیوگن ایک ساتھ فلم کی ریلیز کے معاملے پر بھی ایک دوسرے کے خلاف بیانات دیتے پائے گئے لیکن لگتا ایسا ہے کہ وقت بدل گیا ہے اور دونوں نے اپنے اختلافات بھلانے کا فیصلہ کیا ہے۔شاہ رخ خان ان دنوں بلغاریہ میں موجود ہیں جہاں وہ اور کاجول اپنی فلم دل والے کی عکسبندی کرا رہے ہیں۔ اجے دیوگن بھی کاجول سے ملنے وہاں پہنچے اور پھر شاہ رخ اور اجے کو ایک ریسٹورنٹ میں کھانے پر کافی سنجیدہ انداز میں باتیں کرتا دیکھا گیا۔ بالی ووڈ ذرائع کے مطابق دونوں ایک ساتھ فلم بنانے پر غور کر رہے ہیں تاہم یہ واضح نہیں کہ دونوں س میں اداکاری کرینگے یا ایک فلم پروڈیوسر اور دوسرا ایکٹر بنے گا