ممبئی(نیوزڈیسک) بھارتی فلم انڈسٹری میں کامیابی کے جھنڈے گاڑنے والے چارمنگ پاکستانی اداکارفواد خان نے بولڈ مناظر کے باعث فلم” بیٹل فور بیٹورا“ میں کام کرنے سے منع کردیا جبکہ اب فلم میں ان کی جگہ فرحان اخترمرکزی کردار اداکریں گے۔بالی ووڈ میں کامیابی سے فلمی کیرئیر کا آغاز کرنے والے پاکستانی اداکارفواد خان بولڈ مناظر کی عکس بندی نہ کرانے کی پالیسی کے باعث ایک کے بعد ایک فلموں سے باہر ہوتے جارہے ہیں ۔ حال ہی میں انہیں اداکارہ سونم کپور کے ہمراہ پروڈیوسر رہیاکپور کی فلم ”بیٹل فور بیٹورا“ میں مرکزی کردار نبھانے کی پیشکش ہوئی تھی جسے اداکار فواد خان نے اسکرپٹ میں بولڈمناظر کے باعث ٹھکرادیا تاہم اب فلم میں اداکار فرحان اختر سونم کپور کے ہمراہ جلوہ گر ہوں گے۔واضح رہے کہ اداکار فواد خان نے اداکارہ سونم کپور کے ہمراہ 2014 میں ریلیز ہونے والی فلم ”خوبصورت“ سے بالی ووڈ میں قدم رکھا تھا۔