لاہور(نیوز ڈیسک) اسٹیج اورٹی وی کی اداکارہ مہوش54 برس کی عمر میں دل کا دورہ پڑنے سے انتقال کرگئیں۔ مرحومہ کو آج جمعہ مقامی قبرستان میں سپردخاک کیا جائے گا۔ واضح رہے کہ اداکارہ مہوش نے اپنے فنی سفرکے دوران بہت سے ٹی وی اوراسٹیج ڈراموں میں اہم کردار ادا کئے۔
انھوں نے اپنے کیریئر کے دوران اداکارقوی خان، عرفان کھوسٹ، امان اللہ، جواد وسیم، مستانہ، ببوبرال، عابد خاں، شوکی خاں سمیت دیگرمعروف فنکاروں کے ہمراہ یادگارکردارکئے اورخوب داد سمیٹی۔ لیکن اپنی زندگی کے آخری ایام انھوں نے بڑی تنگدستی میں بسر کیے۔
بچوں کی ملازمت سمیت دیگرمالی مسائل ان کی بیماری کا سبب بنے اورآخرکار وہ زندگی کی بازی ہارکراپنے خالق حقیقی سے جاملیں۔ ان کی وفات پرشوبزکے معروف فنکاروں اداکارعرفان کھوسٹ، ریجا علی، مہرالنسا، دردانہ رحمن، یارمحمدشمسی، شائستہ جبیں، اسد اوردیگرنے کہا ہے کہ مہوش ایک بہترین فنکارہ اورانسان تھیں۔