ممبئی (نیوز ڈیسک)کنگنا نے کہا ہے کہ وہ ایوارڈ شوز میں جانا پسند نہیں کرتیں۔دو بار نیشنل فلم ایوارڈ جیتنے والی اداکارہ کنگنا رناوت ہمیشہ ہی براہ راست اور بیباک بیانات کے لیے فلم انڈسٹری میں مشہور رہی ہیں۔
حال ہی میں ممبئی میں صحافی انوپما چوپڑا کی کتاب ’فرنٹ رو – ?نورسیشن آن سنیما‘ کی تقریبِ رونمائی میں بھی کنگنا نے صحافیوں سے ایسی ہی باتیں کیں۔
کنگنا کا کہنا تھا کہ ’جب میں اتنی کامیاب نہیں تھی تب کوئی میرا انٹرویو بھی لینے نہیں آتا تھا اور اکثر مجھ سے ایک ہی سوال پوچھا جاتا تھا کہ سونم یا دیپکا میں سے کون نیکسٹ جنریشن کی سپرسٹار اداکارہ بنے گی۔‘
کنگنا نے بتایا کہ اس کا جواب وہ کچھ یوں دیتی تھیں کہ ’نہ دیپکا نہ سونم نیکسٹ جنریشن سٹار میں خود ہوں۔‘
کنگنا نے کہا ہے کہ وہ ایوارڈ شوز میں جانا پسند نہیں کرتیں۔
’میں بہت شرمیلی ہوں. مجھے ڈر لگتا ہے اور پسینے چھوٹنے لگتے ہیں اس لیے میں ایوارڈ شوز پر نہیں جاتی۔‘
کنگنا نے یہ بھی کہا کہ اس کی ایک وجہ ان کی حساسیت بھی ہے ’میں بہت حساس ہوں اور تنقید کو بےحد سنجیدگی سے لیتی ہوں یہاں تک کہ بلاوجہ کی تنقید سے بچنے کے لیے میں ٹوئٹر جیسی سوشل نیٹ ورکنگ ویب سائٹ سے بھی دور رہتی ہوں۔‘