اسلام آباد (نیوز ڈیسک)سام سنگ ٹیبلٹ گیلیکسی نوٹ 5 کے بارے میں یہ انکشاف سامنے آیا کہ اس میں سٹائلس پین (S-Pen) کو الٹا داخل کرنے سے S-Pen یا نوٹ 5 یا دونوں ہی ٹوٹ سکتے ہیں، تو ایک تہلکہ برپا ہوگیا اور ہر کوئی نوٹ 5 کی بڑی خامی کے متعلق بات کرنے لگا۔
ٹیکنالوجی ویب سائٹ Android Police کا کہنا ہے کہ اگر آپ نوٹ 5 ہینڈسیٹ کے اندر سٹائلس کو الٹا داخل کریں گے تو یہ اندر پھنس سکتا ہے۔ اسے باہر نکالنے کی کوشش میں سٹائلس بے کار ہوسکتا ہے یا دوسری صورت میں اسے ہینڈ سیٹ کے اندر جکڑنے والا نظام خراب ہوسکتا ہے۔ ویب سائٹ کے مطابق متعدد سوشل میڈیا صارفین نے بھی اس مسئلے کی تصدیق کی ہے۔
یہ تشویشناک خبریں سامنے آنے کے بعد سام سنگ کا ردعمل بھی سامنے آگیا ہے، جس میں احتیاط کی تجویز دی گئی ہے اور مسئلے کی موجودگی سے انکار نہیں کیا گیا۔ سام سنگ نے اپنے بیان میں کہا، ”ہم گیلیکسی نوٹ 5 کے صارفین کو تجویز دیتے ہیں کہ وہ یوزرگائیڈ میں دی گئی ہدایات پر عمل کریں تاکہ S-Pen کو الٹا داخل کرنے کے غیر متوقع تجربے سے بچ سکیں۔“