اسلام آباد (نیوز ڈیسک) انسدادِ دہشت گردی کی عدالت نے 26 نومبر کے جلاؤ گھیراؤ کیس میں وزیراعلیٰ خیبرپختونخوا سہیل آفریدی اور پاکستان تحریک انصاف کے صوبائی صدر جنید اکبر کے گرفتاری کے وارنٹ جاری کر دیے۔ایکسپریس نیوز کے مطابق، عدالت سے وارنٹ جاری ہونے کے بعد اسلام آباد پولیس کی ٹیم خیبرپختونخوا ہاؤس پہنچ گئی تاکہ دونوں رہنماؤں کو حراست میں لیا جا سکے۔
ذرائع کے مطابق، پولیس نفری وارنٹ گرفتاری کے ساتھ کے پی ہاؤس پہنچی جہاں عملے نے وارنٹ وصول کیے، تاہم اُس وقت وزیراعلیٰ سہیل آفریدی وہاں موجود نہیں تھے۔دوسری جانب، خیبرپختونخوا حکومت کے ترجمان نے ایک بیان میں سوشل میڈیا پر گردش کرنے والی خبروں کی وضاحت کرتے ہوئے کہا کہ وزیراعلیٰ اور صوبائی صدر کی ممکنہ گرفتاری سے متعلق پولیس ریڈ کی افواہیں بے بنیاد ہیں۔ترجمان کے مطابق، وزیراعلیٰ سہیل آفریدی اس وقت پشاور میں موجود ہیں، جبکہ تھانہ سیکرٹریٹ کے ایس ایچ او چند اہلکاروں کے ہمراہ صرف وارنٹ کی تعمیل کے لیے خیبرپختونخوا ہاؤس آئے تھے، اور کارروائی مکمل ہونے کے بعد واپس چلے گئے۔
