لاہور(این این آئی)سکولوں کی چھٹیوں میں کمی کی تجویز پر غور شروع کر دیا ، ہفتہ وار چھٹیوں کو ختم یا کم کیا جاسکتا ہے۔
تفصیلات کے مطابق پنجاب کے محکمہ تعلیم نے طلبہ کی کارکردگی بہتر بنانے اور تعلیمی سال کے دوران نصاب کی بروقت تکمیل کو یقینی بنانے کے لیے سکولوں کی چھٹیوں میں کمی کی تجویز پر غور شروع کر دیا ہے۔پرائیویٹ سکولز کی جانب سے مطالبہ کیا گیا ہے کہ آئندہ تعلیمی سال کے دوران ہفتہ وار چھٹیوں کو ختم یا کم کیا جائے تاکہ تعلیمی کیلنڈر کو کم از کم 180دن تک بڑھایا جا سکے۔پاکستان ایجوکیشن فورم کے سربراہ قاضی نعیم انجم نے تجویز پیش کی ہے کہ موسمِ گرما کی چھٹیاں صرف دو ماہ تک محدود کی جائیں، جبکہ جنوری میں ہونے والی موسمِ سرما کی تعطیلات کو 10دن تک کر دیا جائے۔قاضی نعیم انجم نے نشاندہی کی کہ گزشتہ سال غیر اعلانیہ چھٹیوں کی وجہ سے صرف 127دن تعلیمی سرگرمیاں جاری رہ سکیں، جس سے نصاب کی تکمیل میں شدید مشکلات پیش آئیں۔انہوں نے نصاب کی موثر کوریج کے لیے تعطیلات کے دوران سمر کیمپس متعارف کرانے کی بھی سفارش کی ہے۔
