سان فرانسسکو (نیوز ڈیسک)ایپل کمپنی کو پیر کی صبح 75 ارب ڈالر کا نقصان ہوا مگر چیف ایگزیکٹو آفیسر ٹم کک کے ایک بیان نے یہ نقصان پورا کردیا۔
جمعہ کو کاروباری اوقات کے اختتام پر ایپل کے سٹاک مارکیٹ پر شیئرز 105.76 ڈالر پر تھے جو پیر کی صبح 92 ڈالر تک گر گئے جس سے ایپل کو 75 ارب ڈالر کا نقصان ہواجس کے بعد سی ای او ٹم کک نے وال سٹریٹ کے تجزیہ کار سی این بی سی کے جم کریمر کو ایک ای میل کی جس میں بتایا گیا کہ ایپل چین میں بہترین کارکردگی دکھا رہی ہے۔انہوں نے مزید بتایا کہ مجھے ہر روز چین میں کارکردگی کے حوالے سے رپورٹ ملتی ہے اور آج صبح بھی یہ رپورٹ ملی ہے اور میں آپ کو یقین دلاتا ہوں کہ ایپل کا چین میں جولائی اور اگست کے دوران کاروبار تیزی سے بڑھا ہے۔ایپل کا کہنا ہے کہ ہانگ کانگ، تائیوان سمیت گریٹر چین اس کی دوسری سب سے بڑی مارکیٹ ہے اور اس کی ایک چوتھائی آمدنی اسی خطے سے ہوتی ہے۔
ٹم کک نے یہ بھی بتایا ہے کہ چین میں گزشتہ کچھ ہفتوں کے دوران اپیل کی کارکردگی میں بہت بہتری آئی ہے اور امید کی جارہی ہے کہ ایپل کے نئے ماڈلز کی ریلیز کے بعد اس میں مزید بہتری آئے گی۔ٹم کک کے بیان کے بعد سٹاک مارکیٹ پر اپیل کے شیئر کی قمیت دوبارہ سے 108 ڈالر تک چلی گئی اور پھر کاروباری وقت کے آخری آدھے گھنٹے میں 104 ڈالر پر سیٹ ہوگئی۔واضح رہے ایپل اور دیگر امریکی ٹیک کمپنیوں کو پیر کی صبح چین کی معیشت کے حوالے سے خدشات کے باعث سٹاک مارکیٹ پر شدید نقصان ہوا۔