اسلام آباد (نیوزڈیسک )برطانیہ میں موبائل فون فروخت کرنے والی کمپنی کارفون ویئرہاو¿س کا کہنا ہے کہ ایک سائبر حملے میں ہیکرز نے ممکنہ طور پر اس کے 24 لاکھ صارفین کی ذاتی معلومات تک رسائی حاصل کی ہے۔کمپنی کو سائبر حملے کے بارے میں بدھ کو پتہ چلا تھا تاہم اس بارے میں مزید تفصیلات سنیچر کو سامنے آئی ہیں۔کارفون ویئر ہاو¿س نے اس واقعے پر اپنے صارفین سے معذرت کی ہے اور کہا ہے کہ وہ اپنے تمام صارفین سے رابطہ کر رہا ہے جبکہ نظام کو محفوظ بنانے کے لیے مزید اقدامات بھی کیے جا رہے ہیں۔کمپنی کا کہنا ہے کہ سائبر حملہ اس کے اس ڈویڑن پر کیا گیا جو OneStopPhoneShop.com, e2save.com اور Mobiles.co.uk جیسی ویب سائٹس کو چلاتا ہے۔کمپنی نے سنیچر کو جاری ہونے والے بیان میں کہا ہے کہ اس نے اپنے نظام کو محفوظ بنانے کے لیے فوری طور پر اقدامات کیے اور معاملے کی تحقیقات بھی شروع کر دی تھیں جن سے یہ پتہ چلا کہ 24 لاکھ کے قریب صارفین کے نام، پتے اور بینک کی معلومات تک ممکنہ طور پر رسائی حاصل کی گئی ہے۔کار فون ویئر ہاو¿س کا کہنا ہے کہ اس کے علاوہ 90 ہزار صارفین کے کریڈٹ کارڈ کی معلومات بھی ممکنہ طور پر حاصل کی گئی ہیں۔کمپنی کے گروپ چیف ایگزیکیٹو سباسچیئن جیمز نے بیان میں کہا ہے کہ ’ہم صارفین کے ڈیٹا کے تحفظ کے معاملے میں بہت سنجیدہ ہیں اور ہمیں بہت افسوس ہے کہ ہمارے نظام پر حملے کی وجہ سے صارفین متاثر ہوئے۔‘ان کا یہ بھی کہنا ہے کہ اس حملے سے ممکنہ طور پر متاثر ہونے والے صارفین کو مطلع کر دیا گیا ہے اور سائبر حملے کے بعد مزید حفاظتی اقدامات بھی کیے گئے ہیں۔برطانیہ میں صارفین کے ڈیٹا کے معاملے میں انفارمیشن کمشنر کا دفتر نگران اور منتظم ادارہ ہے۔اگر تحقیقات سے یہ ثابت ہوا کہ کمپنی نے اپنے صارفین کی ذاتی معلومات کے تحفظ میں کوتاہی برتی تھی تو یہ ادارہ اسے پانچ لاکھ پاو¿نڈ تک جرمانہ بھی کر سکتا ہے۔