چنیوٹ ، پشاور(این این آئی)پاکستان تحریک انصاف چنیوٹ کے ضلعی صدر ذوالفقار علی شاہ نے پارٹی چھوڑنے کا اعلان کردیا۔ذوالفقار علی شاہ نے میڈیا سے گفتگو میں کہا کہ میں نے اپنی مکمل سیاسی قوت تحریک انصاف کے لیے وقف کردی تھی، مجھے معلوم ہے کہ آج کے بعد مجھے شدید ردعمل کا سامنا کرنے پڑے گا۔

مجھے برا بھلا کہا جائے گا کہ مشکل وقت میں پارٹی چھوڑ کر چلا جائے گا۔انہوں نے کہا کہ میں ہر چیز کی قیمت دینے کے لیے تیار ہوں لیکن میں ریاست مخالف نہیں ہوں، میرے خون میں ہی نہیں کہ میں ریاست مخالف ہوجائوں، میں پارٹی عہدے اور پارٹی رکنیت سے استعفیٰ دے رہا ہوں، اگر یہی سیاست ہے تو میں ایسی سیاسی سرگرمیوں کا حصہ نہیں بن سکتا۔علاوہ ازیں خیبر پختونخوا کے سابق صوبائی وزیر ڈاکٹر ہشام انعام اللہ نے پاکستان تحریک انصاف چھوڑنے کا اعلان کردیا۔میڈیا سے گفتگو کرتے ہوئے انہوںنے کہاکہ 9 مئی کے سیاہ دن ہمارے شہدا کی توہین کی گئی ان کی تصاویر جلائی گئیں، مجسمے گرائے گئے، شرپسند عناصر نے پاکستان کے وقار کو مجروح کیا جو میری نظر میں قابل مذمت اور قابل معافی ہے۔انہوں نے کہا کہ میں 9 مئی کے واقعات کے بعد تحریک انصاف سے منسلک رہنا اپنی توہین اور ملک سے بے وفائی تصور کرتا ہوں۔انہوں نے کہا کہ لہٰذا میں پی ٹی آئی کے رکن کی حیثیت سے استعفیٰ دیتا ہوں، ساتھ ہی انہوں نے واضح کیا کہ انہوں نے یہ فیصلہ کسی دباؤ میں نہیں کیا۔

موضوعات:۔پی ٹی آئی