رحیم یار خان (این این آئی)رحیم یار خان اور راجن پور کے کچے کے علاقے میں پولیس کا ڈاکوئوں کے خلاف آپریشن 22 ویں روز میں داخل ہو گیا ہے، اب تک 7 ڈاکوؤں کو ہلاک اور متعدد کو گرفتار کیا گیا ۔پولیس کے ترجمان کے مطابق رحیم یار خان میں آپریشن میں کلیئر کروائے گئے کچے کے علاقوں میں پولیس گشت کر رہی ہے۔
پولیس کے مطابق داخلی اور خارجی راستوں پر ناکہ بندی کی گئی ہے اور آنے جانے والوں کی چیکنگ بھی کی جا رہی ہے۔ترجمان نے بتایا کہ پولیس کچے کے ڈاکوؤں کے خلاف پیش قدمی جاری رکھے ہوئے ہے، ڈاکوؤں کے خفیہ ٹھکانوں پر ٹارگٹڈ کارروائیاں بھی جاری ہیں۔ترجمان پولیس کے مطابق آپریشن میں 3 ڈاکو ہلاک اور 28 کو گرفتار کیا گیا ہے ،ان سے اسلحہ بھی آمد ہوا ہے۔دوسری جانب ڈی پی او محمد ناصر سیال نے بتایا کہ راجن پور میں پولیس کے دستوں نے کچہ میانوالی ون کا کنٹرول حاصل کر لیا ہے۔انہوں نے بتایا کہ کچہ میانوالی ون میں ڈاکوؤں کے ٹھکانوں، کمین گاہوں کو تباہ کر دیا گیا اور علاقے میں پولیس چوکیاں قائم کر دی گئی ہیں۔ڈی پی او محمد ناصر سیال کے مطابق یہاں اب تک 4 ڈاکو ہلاک، 8 زخمی ہوئے ہیں جبکہ 5 ڈاکوؤں کو اسلحے سمیت گرفتار کیا گیا ہے جبکہ ڈاکوؤں کے 20 سہولت کار بھی گرفتار کیے جا چکے ہیں۔
