اسلام آباد (این این آئی) پاکستان مسلم لیگ (ن )کی ترجمان مریم اورنگزیب نے شہباز شریف کو بکتر بند گاڑی میں ہسپتال لانے کی شدید مذمت کرتے ہوئے کہا ہے کہ سلیکٹڈ عمران خان کی طاقت صرف شہبا شریف کو بکتر بند گاڑی میں لانے پہ
چلتی ہے کیونکہ حکومت چلانا اْن کے بس کی بات نہیں ۔ اپنے بیان میں انہوںنے کہاکہ بے بس عمران خان کا بس صرف شہباز شریف کو تکلیف پہنچانے پہ چلتا ہے ،شہباز شریف کا شدید کمر درد کے باوجود بکتر بند گاڑی میں ہسپتال لایا گیا۔مریم اورنگزیب نے کہاکہ شہباز شریف کو گرفتار کر کے گلگت بلتستان کا الیکشن چْرایا گیا،کرپشن کے بعد غداری کا بیانیہ دفن ہونے کے بعد عمران خان شہباز شریف کی صحت پہ سیاست کر رہے ہیں۔ انہوںنے کہاکہ اسی بکتر بند گاڑی کی وجہ سے شہباز شریف کی کمر درد میں اضافہ ہوا،یہ عمران خان کی گھٹیا سوچ ہے جس کی وجہ سے شہباز شریف کے ساتھ ایسا ناروا سلوک برتا جا رہا ہے۔مریم اورنگزیب نے کہاکہ عمران خان کی اس طرز عمل کی شدید مذمت کرتے ہیں۔انہوںنے کہاکہ شہباز شریف کو مناسب طبی سہولتیں مہیا نہ کرنا عمران صاحب اپنی بڑائی سمجھتے ہیں۔
