اسلام آباد(آئی این پی)وفاقی وزیر ریلوے شیخ رشید احمد نے چیئرمین پی اے سی کے حوالے سے حکومتی فیصلے پر شدید تحفظات کا اظہار کرتے ہوئے کہا ہے کہ حکومت اگر پبلک اکاؤنٹس کمیٹی کی چیئرمین شپ ریمانڈ والے شخص کو دینے پر مان گئی ہے تو خدشہ ہے کہ وہ مزید مطالبے بھی مان لے گی،شہباز شریف کی اہلیہ تہمینہ درانی این آر او کیلئے سرگرم ہیں ، اطلاعات یہ ہیں کہ لوگ درمیانے راستے کی تلاش میں ہیں ،
زرداری ملک کے صدر کیا کونسلر بھی نہیں بن سکتے تھے نوازشریف نے اپنے تمام کیسز ناقص انداز میں لڑے ۔وہ جمعرات کو نجی ٹی وی سے گفتگو کر رہے تھے ۔ شیخ رشید نے کہا کہ نوازشریف نے اپنے تمام کیسز ناقص انداز میں لڑے ، (ن) لیگ کے سب ہی لوگ شہبازشریف پر سہارا کئے بیٹھے ہیں ، نوازشریف کو لینے ان کے بھائی بھی ایئرپورٹ نہیں پہنچے، جو شخص ریمانڈ پر ہو اس کے پروڈکشنز آرڈر جاری نہیں ہونے چاہئیں ، چیئرمین پی اے سی کے معاملے پر مجھے شدید تحفظات ہیں ، حکومت پی اے سی پر مان گئی تو مزید مطالبے بھی مان لے گی ۔انہوں نے کہا کہ اپوزیشن لیڈر شہبازشریف این آر او مانگ رہے ہیں ، شہباز شریف کی اہلیہ تہمینہ درانی این آر او کیلئے سرگرم ہیں ، اطلاعات یہ ہیں کہ لوگ درمیانے کی راستے کی تلاش میں ہیں ، اگر میری اطلاع غلط ہے تو بتا دیں مان لوں گا ، مشرف سے این آر او میں شہباز شریف کا مرکزی کردار تھا ۔آصف زرداری بینظیر بھٹو کے زریعے سیاست میں آئے ، زرداری ملک کے صدر کیا کونسلر بھی نہیں بن سکتے تھے، بلاول بھٹوکو آصف علی زرداری کے ساتھ نہیں دیکھ رہا ، بلاول کو زرداری کی حقیقت کا علم ہو گا تو یہ رویہ بدل جائے گا ، آئندہ تین ہفتے کے دوران جھاڑو پھرتے دیکھ رہا ہوں ۔ شیخ رشید کا مزید کہنا تھا کہ شریف برادران ملک کے بے تاج بادشاہ بنے بیٹھے تھے، عمران خان نے درست کہا ہارتاوہ ہے جو ہار مان لیتا ہے، عمران خان نے جدوجہد کی آج وہ کامیاب ہے۔
