اسلام آباد(نیوز ڈیسک)ڈائیوو بس میں سفر کے دوران ایک خاتون مسافر کی فوری اور ہمت بھرپور کارروائی کی بدولت ایک شخص گرفتار کر لیا گیا جو دورانِ سفر اپنے موبائل فون پر فحش مواد دیکھ رہا تھا۔سوشل میڈیا پر وائرل ہونے والی ویڈیو میں دیکھا جا سکتا ہے کہ خاتون نے بہادری اور ہوشیاری کا مظاہرہ کرتے ہوئے بس کے عملے کو اس غیر مناسب حرکت کے بارے میں آگاہ کیا۔ فوری کارروائی کے بعد بس انتظامیہ نے ملزم کو مقامی پولیس کے حوالے کر دیا۔
خاتون مسافر نے بتایا کہ ملزم پورے سفر کے دوران یہ مواد دیکھ رہا تھا اور سیٹ پیچھے کر کے دیگر مسافروں کو بھی دکھانے کی کوشش کر رہا تھا، اور اس کے ویڈیو شواہد بھی موجود ہیں۔صارفین نے خاتون کی بروقت اطلاع اور جرأت کو سراہا اور کہا کہ اس اقدام کی وجہ سے دیگر مسافروں کو ممکنہ ذہنی اذیت سے بچایا گیا۔ متعدد افراد نے مطالبہ کیا کہ ایسے رویے کے مرتکب افراد کو سخت سزا دی جائے تاکہ عوامی مقامات پر اخلاقی رویے کی حوصلہ افزائی ہو۔
