لاہور( این این آئی)سابق اسپیکر قومی اسمبلی سردار ایاز صادق نے کہا ہے کہ تحریک انصاف والے ایک نام دیتے ہیں اور واپس لے لیتے ہیں ،کل کابینہ بنائیں گے اور واپس لے لیں گے ،نیوکلیئر بٹن دبائیں گے اسے واپس لیں گے لیکن وہ تو واپس نہیں آئے گا ۔ یہاں گفتگو کرتے ہوئے ایاز صادق نے کہا کہ تحریک انصاف نے اپنے پیش کردہ نام واپس لئے ، جن کا نام واپس لیا گیا وہ اچھے کردار کے حامل تھے ،پی ٹی آئی والے فکر سے عاری لوگ ہیں۔ انہوں نے کہا کہ یہ کیفیوژ

لوگ ہیں ان سے کچھ بھی توقع کی جا سکتی ہے ۔ یہ کل کو کابینہ بنائیں گے تو اسے واپس لے لیں گے ، نیوکلیئر بٹن دبائیں گے اسے واپس لیں گے لیکن وہ تو واپس نہیں آئے گا ۔ یہ لوگ ملک چلائیں گے بلکہ یہ تو کنفیوژن پیدا کر دیں گے ۔ انہوں نے کہا کہ 2002 اور2008میں بھی (ن) لیگ کے خلاف سازشیں ہوئیں لیکن اللہ تعالیٰ جن کے ساتھ ہو انہیں ان سازشوں سے کوئی فرق نہیں پڑتا ۔ انہوں نے کہا کہ انتخابات وقت پر ہونے چاہئیں اورہم انتخابات وقت پر کرانا چاہتے ہیں۔