لاہور(مانیٹرنگ ڈیسک) شیخ زید ہسپتال میں ینگ ڈاکٹرز اور پیرا میڈیکل سٹاف کے درمیان جھگڑا ہو گیا ، دونوں جانب سے ایکدوسرے پر لاتوں اور گھونسوں کا آزادانہ استعمال کیا گیا ،ینگ ڈاکٹرز نے ہسپتال میں کام بند کرنے کا اعلان کر دیا ۔بتایاگیا ہے کہ گزشتہ روز شیخ زید ہسپتال میں ینگ ڈاکٹرز اور پیرا میڈیکل سٹاف میں معمولی بات پر تلخ کلامی ہو گئی جس کے بعد نوبت جھگڑے تک پہنچ گئی ۔ اطلاع ملنے پر ہسپتال میں موجود ینگ ڈاکٹرز اور پیرا میڈیکل سٹاف ایک دوسرے کے
آمنے سامنے آگئے اور ہاتھا پائی کے بعد لاتوں اور گھونسوں کا آزادانہ استعمال کیا گیا ۔اس دوران ہسپتال کے کیش کاؤنٹر کے شیشے ٹوٹ گئے ۔ہسپتال انتظامیہ نے فوری طور پر پولیس کی بھاری نفری طلب کرلی جس نے موقع پر پہنچ کر حالات کو قابو کیا ۔ دونوں جانب سے ہسپتال کے احاطے میں ایک دوسرے کے خلاف احتجاج بھی کیا گیا ۔ ینگ ڈاکٹرز نے ہسپتال میں کام بند کرنے کا اعلان کر دیا ۔بتایا گیا ہے کہ انتظامیہ کی جانب سے واقعہ کی تحقیقات کیلئے کمیٹی تشکیل دیدی گئی ہے۔
