اسلام آباد(این این آئی)حکومت نے ہائی سپیڈ ڈیزل اور پٹرول کی قیمت میں معمولی کمی کردی۔

وزارت توانائی کی جانب سے جاری نوٹیفکیشن کے مطابق آئل اینڈ گیس ریگولیٹر اتھارٹی (اوگرا)نے وفاقی حکومت کے طریقہ کار کی بنیاد پر پیٹرولیم مصنوعات کی قیمتوں میں ردوبدل کردیا ہے۔نوٹیفکیشن کے مطابق ہائی اسپیڈ ڈیزل کی فی لیٹر قیمت میں 4روپے 21پیسے فی لیٹر کمی کردی گئی ہے اور نئی قیمت 414روپے 75پیسے فی لیٹر مقرر کی گئی ہے۔حکومت نے پیٹرول کی قیمت میں ایک روپیہ 93پیسے فی لیٹر کمی کی اور نئی قیمت 390روپے 12پیسے فی لیٹر مقرر کردی ہے۔نوٹیفکیشن کے مطابق پیٹرول اور ڈیزل کی نئی قیمت کا اطلاق (آج)24ستمبر کیلئے ہے۔وزارت توانائی کی جانب سے جاری نوٹیفکیشن میں بتایا گیا کہ عالمی سطح پر پلاٹس ریٹس، پریمیم اور دیگر عوامل میں تبدیلی کے باعث پیٹرولیم مصنوعات کی قیمتوں میں ردوبدل کیا گیا ہے۔