اسلام آباد: آئی جی محمد سہیل چوہدری سے پاکستان گڈز ٹرانسپورٹ الائنس کے وفد نے ملاقات کی، جس میں ٹرانسپورٹرز کو درپیش مسائل اور مختلف مقامات پر کنٹینرز روکے جانے کے معاملے پر اہم فیصلے کیے گئے۔
ترجمان اسلام آباد پولیس کے مطابق ملاقات میں پاکستان گڈز ٹرانسپورٹ الائنس کے نمائندگان کے ساتھ ڈی آئی جی ہیڈکوارٹرز جواد طارق بھی شریک تھے۔ ملاقات کے دوران ٹرانسپورٹرز نے اپنے مسائل سے آئی جی اسلام آباد کو آگاہ کیا۔
آئی جی محمد سہیل چوہدری نے ہدایت کی کہ ادویات، خوراک اور دیگر جلد خراب ہونے والی اشیا لے جانے والے کنٹینرز کو بلا تاخیر ان کے مالکان کے حوالے کیا جائے۔
انہوں نے کہا کہ شہر میں امن و امان اور سیکیورٹی کے انتظامات کے لیے جن کنٹینرز کو پولیس کی جانب سے استعمال کیا گیا ہے، ان کے مالکان کو مقررہ کرایہ ادا کیا جائے گا۔
آئی جی اسلام آباد نے ٹرانسپورٹرز کی خدمات کو سراہتے ہوئے کہا کہ ملکی معیشت اور عوامی ضروریات کی تکمیل میں گڈز ٹرانسپورٹ کا اہم کردار ہے۔ انہوں نے پولیس اور ٹرانسپورٹرز کے درمیان رابطے اور تعاون کو مزید مؤثر بنانے کی یقین دہانی بھی کرائی۔
ملاقات میں اس عزم کا اظہار کیا گیا کہ باہمی تعاون کے ذریعے شہریوں کی نقل و حرکت اور تجارتی سرگرمیوں کو بلا رکاوٹ جاری رکھنے کے لیے اقدامات کیے جائیں گے۔
